DILI mobabag ang San Miguel Corporation kon dawaton ni Brgy. Ginebra Gin Kings coach Tim Cone ang tanyag nga siya maoy mogiya sa Gilas Pilipinas alang sa 30th Southeast Asian Games nga ipahigayon sa Pilipinas karong Nobiyembre 30 hangtod Disyembre 11.
Ang top management sa SMC mihatag na og pagtugot kang Cone aron estudyohan ang tanyag sa Samahang Basketbol ng Pilipinas (SBP).
Gikompirmar kini mismo ni SMC sports director Alfrancis Chua, kinsa mitataw nga andam kanunay mohatag og kinatibuk-ang suporta ang ilang kompanya kon alang sa nasod.
“Basta para sa bayan, full support kami ng Boss Ramon Ang (SMC president) ko,” matod ni Chua sa interbyu sa www.spin.ph.
Giangkon ni Cone nga nakighugpong na siya kang SBP president Al S. Panlilio kabahin niini apan wala pa siya’y pinal nga desisyon.
Gipasabot ni Cone nga ning puntoha, nakatutok pa siya sa kampanya sa Brgy. Ginebra alang sa Governor’s Cup sa Philippine Basketball Association (PBA).
Subay niini, gipadayag ni SBP chairman Emeritus Manny V. Pangilinan nga gawas sa head coach mokuha usab sila og program director nga maoy mopahaom sa hataas nga programa alang sa Gilas.
“The program will drive the selection of the coach. So we have to conceptualize the program, the kind of qualities that we want to see from a coach,” matod ni Pangilinan.
Kinihanglan ang maong program director aduna igong kasinatian sa mga international brand sa duwa.
Usa sa gipanglantawan niini mao si Tab Baldwin kinsa usa usab sa molangkub sa search committee uban ni kanhi Gilas coach Chot Reyes.
“The program director is to oversee the program, do the planning, the budget. We should run it like a business,” pasabot sa giilang patron sa basketball sa nasod. Ilang gitun-an usab karon ang pagpakitambayayong sa collegiate leagues tungod kay laraw sa SBP mao man ang training gawas sa nasod ug pagsalmot og mga tournament sud sa usa ka tuig.
Gipasumbingay ni Pangilinan nga bisan pa man og mabintahaan ang mga Pinoy sa gitas-on ug gidak-on apan siya nagtuo nga makapakita kini og igong kombati kon anaa lang sa sakto nga preparasyon.
Iyang giihemplo ang performance sa Dominican Republic ug sa Argentina nga bisan og ug walay igong gitas-on ug gidak-on apan nakapakita kini og saktong labok didto sa China. (ESL)