NAKAHIGAYON ko og hugoy hugoy sa akong mga kauban sa cebu media atol sa pagbukas sa Press Freedom Week celebration sa miaging semana. Mubo ra kaayo ang maong panahon pero mapasalamaton kaayo ko nga ako silang gikauban sa usa ka dakong selebrasyon.
Sa tinud-anay lang ang naka nindot sa panerbisyo sa media dinhi sa Sugbo kay way suya-ay. Bisan sa ka higpit sa kompetisyon di ka makasinati og panagribal paghagpat sa mga balita. Mao nga kong makakita mo nila sa mga dagkong coverage sama sa alarma sa sunog, patay ug uban pa nga magpundok sa usa ka lugar timailhan kana sa ka init sa ilang relasyon.
Diha man gani usa ka higayon nga ang reporter sa laing TV station akong gitabangan nga mahiling og doktor human nako masayri gikan sa iyang cameraman nga may gipamati siya sa iyang tutunlan. Bisan kong wa siya magpatabang tungod kay naatol nga diha ang akong higalang doktor sa dapit diin kami nag-abot ako siyang gisultian nga magpahiling sa doktor. Para nako nagribal man ang atong estasyonan tungod sa rating game apan di ni rason nga di nata magtingganay kong mag-abot sa usa ka coverage.
Sa mga tinun-an sa mass communication nga nagplano nga motrabaho isip tigbalita, ang birtud sa pagpakig sandurot angayan nga batonan kanunay. Sama niadtong gi-organisar namo ang labing una nga kahugpongan sa mga tigbalita nga nag-cover sa kalihukan sa Cebu City Hall.
Gitawag kini nga City Hall Association of Reporters in Media kun CHARM, daghan sa mga reporter ilabi na kadtong bag-o pa, ang gitabangan sa ilang kaubang reporter nga makuha ang gi-assign sa ilang newsroom nga isyu.
Di baya sayon kanang idistino ka og bag-ong assignment. Ang sali nimong masampit ang imo ra sab nga kauban sa maong beat. Hisgut ta og CHARM dako kaayo ni og papel pagpalambo sa relasyon sa mga reportet tali sa mga opisyales sa city hall isip mga news sources.
Tumang pag-amping nga di mabikil ang maayong relasyon nga maoy usa sa tuyo sa maong kahugpongan. Niadtong panahona ang CHARM pay nagbarug nga kahugpongan sa mga beat reporter hangtod nga nagtukod sab og ila ang mga reporter nga nag-cover sa kapitolyo. Gikan sa kapitolyo nanakod ni sa Palace of Justice, PNP ug militar, Mandaue ug Lapulapu City, regional offices ug ang grupo sa mga cameraman ug photographer.
***
Sa administrasyon ni kanhi Presidente Gloria Arroyo, nakaapil sab ko og pabarug sa labing una nga Malacañang Press Corps sa Sugbo. Kini pinaagi sa tabang sa nitaliwan nga Press Secretary Cerge Remonde. Pinaagi kang Cerge tinguha sa pagtukod sa maong grupo mao ang pagpalig-on sa han-ay sa mga reporter nga mo-cover sa mga presidential visit.
Usa sa gitutukan nga isyu kaniadto mao ang giingong di patas nga tratamento nga masinati sa mga reporter sa Sugbo tali sa among counterpart sa Manila.
Kinsa man guy ganahan anang mag-presscon ra silag ila kay kuno national issue. Sa pagkatukod sa Malacañang Press Corps usa nalang ang presscon . Local ug national issue mahimong ipangutana sa way pagpanagana. Hinuon human sa termino ni Arroyo napapas ra sab ang maong grupo kay di naman sab aktibo ang Malakanyang sa Sugbo. Pero di ni rason nga mawagtang ang maong grupo.
Nindot kong ipadayon kini alang sa mga reporter nga mag-cover og presidential visit. Lainon lang siguro ang pangalan. Naa pa ang kanhi Malakanyang sa Sugbo pero makita nato nga wa na matagad. Ngitngit panahon sa gabii og gituboan na og daghang sagbot.
Way kalainan sa haunted house. May naghisgut kaniadto nga mobalik pag-opisina ang Buru sa Adwana. May naghisgut sab nga himoon kini nga museum.