MAS pro-active karon ang lokal nga kagamhanan sa dakbayan sa Naga tungod sa hugtanong pag-awhag sa dili mominos sa 400 ka pamilya nga namuyo sa unom ka mga sitio sulod sa unom ka mga bukirang barangay.
Matod pa, ang mga liki nadiskobrehan niadtong Septiyembre 12, Huwebes, pito ka mga adlaw sa dili pa ang unang anibersayo sa pagdahili sa yuta sa Barangay Tina-an nga nikalas og halos 80 ka mga kinabuhi.
Si City of Naga Acting Mayor Kristine Vanessa Chiong nihangyo niya ang mga residente sa apektado nga sityo nga mobakwit tungod kay namuyo sila sulod sa 'no-habitation zone' nga gi-identify sa Mines and Geosciences Bureau (MGB) Central Visayas nga peligro puy-an human sa landslide sa miaging tuig.
Nagpuyo ang 400 ka mga pamilya sulod sa unom ka sitio nga sakop sa Barangay Inoburan, Tina-an, Naalad, Mainit, Cabungahan ug Uling.
Apan ang MGB Central Visayas walay dinaliang reaksiyon sa mayor. Kahinumdoman, dihang wala pa mahitabo ang dakong landside sa miaging tuiga, ang MBG nipagawas na og mando sa pagpamakwit sa mga residente sa dapit ug pahunong sa quarry operation.
Subay sa taho, ang mga tawo ninghangyo sa mayor nga dili mapahawa sa dapit, diin daghan usab kanila nanarbaho sa quarry operation alang usa ka pabrika sa semento sa dapit. Ug nahitabo ang trahedya. Masulub-ong kasaysayan sa dapit.
Nganong dili kaayo agresibo karon ang MGB? Unsa kining giingong mga liki, bag-o o karaan? Maayong maklaro.
Sa pagkakaron, atong sugyot nga maghiusa ang lokal ug ahensiya sa kagamhanan sa paghimo og pakisusi ug dungan mopagawas sa ilang advisory aron mas lig-on ug katuohan kini. Way mabasol. Ang lumolupyo sa dapit, mas labawng nasayod sa kahimtang sa dapit. Kooperar sa pakisusi ug solusyon.