MOABOT sa P100,000 ang gibilin nga danyos sa niulbong sunog kagahapon sa buntag, Dominggo, Septiyembre 22, diha sa pribadong compound nga gihimong garahe sa mga trailer trucks ug tambakan sa mga nagamit na nga ligid diha sa Barangay Cabancalan sa siyudad sa Mandaue.
Sa pasiunang kasayuran sa kabomberohan, may giingong may nagdaob og basura duol sa dapit.
Tungod sa kusog nga huros sa hangin nikatay kini sa bahin kon asa gitambak ang mga ligid ang usa ka awto ug nakan-an usab ang usa ka prime mover nga iya sa Blue Bunny Trucking.
Matod sa mga residente nga matag adlaw may ga sunog gyud sa ilang mga basura sa dapit.
Saysay ni Deputy Fire Inspector Kyle Bryan Lauzon nga hugtanon nga gidili sa balaod ang pagdaob ubos sa RA 9003 ug mamultahan og dili mominos sa P1,000 o ba kaha mag atubang ug kaso ang masakpan nga nagsunog ug basura.
Ang balaud kabahin sa pagpanalipod sa kalikupan labi na sa gikatahong nagkanipis o buho sa ozone layer nga nagsala unta sa tumang kainit sa adlaw, hinung sa global warming.
Wala hinuoy mga panimalay nga naamong sa maong insidente.
Pahimangno sa kabomberohan nga likayan ang pagdaob nga maoy sagad hinungdan sa pagtakud-takod sa kayo.
Nadawat sa kabomberohan ang alarma sa sunog alas 10:15 sa buntag ug hingpit napawong sa alas 11:03 sa buntag. (ANV)