2 gipusil-patay sa Casili nailhan na sa kapulisan

LAWAS sa duha ka mga biktima sa pagpamusil-patay napalagan sa Barangay Casili, dakbayan sa Mandaue niadtong Septiyembre 21, Sabado, nailhan na.

Duha ka mga lalaki nga gigapos ug patay na diha sa bakanteng luna sa Casili giila sa kapulisan nga sila si Ryan Barbosa Taniega, 27, taga Barangay Punta Princesa sa siyudad sa Sugbo ug si Stephen Gallardo Balbuena, 24, molupyo usab sa maong dapit.

Saysay ni Police Corporal Cyrus Buot sa Canduman Police station nga giingong may usa ka itom nga van nga mihunong sa maong lugar, nakadungog usab ug butobuto ang mga anaa sa palibot.

Nakit-an na lang nila nga may duka ka mga lalaki na nga gigapos og tape ang mga kamot ug baba niini.

May inagian usab nga samad pinusilan ang duha sa ulo, liog, papangig ug dughan.

Nakita usab sa duol sa ilang nahimutangan ang folder nga may suwat nga “Tulisan mi”.

Nakuha sa crime scene ang tulo ka kabhang sa calibre 45 nga armas.

Sa pakisusi sa Scene of the Crime Operatives (SOCO), nakuha ang tulo ka mga gagmayng pakete sa gidudahang shabu.

Ganihang buntag, duha ka mga babaye ang miduol sa police station ug misusi sa duha ka mga biktima nga anaa karon nahimutang sa Rolling Hills Funeral Homes sa maong dakbayan.

Padayon pa ang pakisusi sa kapulisan sa mga nagpaluyo sa maong krimen.

Nasayran nga sunodsunod ang kaso sa pagpatay sa dapit, apan wa masuta kon konektado ba kini nga kaso. (ANV)