Ex-Pulis, kauban sikop

KANHI pulis nga nag-absent without leave (Awol) nadakpan sa kapulisan sa buy-bust niadtong Sabado, Septiyembre 21, sa hapon sa Barangay Poblacion, lungsod sa Pinamungajan.

Ang mga sakop sa Provincial Intelligence Branch (PIB) ug mga sakop sa Provincial Drug Enforcement Unit (PDEU) sa Cebu Provincial Police Office (CPPO) gipangulohan ni PLt.Col. Marlu Conag, hepe sa PIB nga niresulta sa pagkasikop sa pulis ug laing usa ka kauban, lakip sa iyang tinubdan sa drugas.

Ang dinakpan giila nga si kanhi PCpl. Christian Ando, 34, ug molupyo sa Barangay Poblacion, Pinamungajan ug sinaligan niini nga apil nadakpan nga si Allan Abaquita, 44, ug molupyo sa maong dapit.

Sa gihimong buy-bust, nasakmit ang gibanabanang 25 gramos nga shabu nga moabot na sa P175 mil nga kantidad base sa iyang DDB value.

Matud ni Conag, ilang giplano ang pagkadakop kang Ando human niabot sa ilang buhatan ang taho nga namaligya og drugas ang kanhi pulis.

Ni-Awol si Ando niadtong tuig 2018.

Apan pasangil sa pulis nga nakahukom kini nga di mo-duty human nga na-low morale tungod sa wala na makadawat og allowance gikan sa kagamhanang lokal sa dakbayan sa Lapu-Lapu kon diin didto katapusang nadestino sa Presinto 2.

Dugang ni Ando nga duna siyay banda ug nagsugod siya sa paggamit og druga human natangtang sa serbisyo.

Nahibaloan sa kapulisan nga ang kanhi pulis nakaasawa og anak sa kasamtangan nga kapitan sa Barangay Poblacion sa lungsod sa Pinamungajan apan nasayran nga sa kapulisan nga gikan kini sa laing lungsod ang kagikan.

Gikonsiderar usab sa pangulo sa PIB nga si Ando ug Abaquita anaa nabutang sa listahan nga high value target (HVT) sanglit nga kanhi miyembro siya sa PNP organization.

Sa laing bahin, sa gihimong follow-up operation sa samang mga operatiba, nadakpan ang usa ka lola nga si Cristita Garcia, 57, taga Sitio Punyang, Barangay Duljo Fatima, siyudad sa Sugbo.

Si Garcia maoy gitudlo nasikop nga pulis nga iyang tinubdan sa mga shabu nga ibaligya didto sa lungsod sa Pinamungajan.

Duha pa ang nadakpan sa gihimong follow-up operation sa mga operatiba nga sila si Brex Neli Ibale, 29, ug Eric Ibale, 27, taga Barangay Tayud sa lungsod sa Consolacion.

Ang duha ka laing dinakpan naabtan nga naa sa sulod sa balay ni Garcia nga gituohang mangumpra og shabu alang sa ilang ibaligya sa ilang lungsod.

Nasakmitan ang laing 50 gramos giian ni Garcia nga mokantidad sa P175 mil ang balor niini.

Si Garcia, sa dihang gipangutana sa Superbalita Cebu kon kinsa nga mga sakop sa kapulisan kaniadto ang tigkuhaan kaniya, ug nikopirmar niya nga si Ando usa sa mga mokompra og drugas kaniya lakip sa laing pulis nga magkuhaan kaniya apan wala na usab kini sa serbisyo karon.

Nihangyo ang pangulo sa PIB nga di una ibutyag ang pangalan sa laing pulis samtang nagpadayon ang ilang follow-up operation sa pagkakaron sa pagsikop sa dugang kauban sa grupo. (B)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph