NIPAKLI si Vince Carter og 25 puntos ug ang Orlando Magic nipakgang sa uwahing rally sa Los Angeles Lakers aron kuliton ang 96-94 nga kadaugan sa duwa nga gihulagwayng rematch sa niaging NBA finals.

Kadto maoy ikatulong sunodsunod nga kapildihan nga naangkon sa Lakers, butang nga wa mahitabo sukad nakuha nila ang Katsila nga si Pau Gasol niadtong Pebrero 2008.

"The Manny Pacquiao Blog". Click here for stories and updates on the Filipino boxing champ.

Midugang og tag 15 puntos matag usa sila si Dwight Howard ug Jameer Nelson alang sa Magic kinsa nirehistro sa ilang ikalimang sunodsunod nga kadaugan.

Sa pildirong Lakers si Kobe Bryant mipabuto og 34 points, 18 niini sa fourth quarter, bisan pa man og dunay sakit sa iyang tiyan hinungdan nga wa kaayo kini pasudla sa ikaduhang quarter.

Niadtong Enero, ang Lakers mibuntog sa Magic sa ilang unang panagtagbo sukad mahuman ang ilang NBA Finals sa niaging tuig.

Sa laing duwa, kulbahinam usab nga nabuntog sa Boston Celtics ang Washington Wizards, 86-83.

Si Ray Allen nitapos sa duwa nga may 25 puntos, lakip na ang three-pointer niini sa katapusang 17.1 segundos nga nahabilin.

Naggukod ang Boston, 79-66 sa katapusang 6:11 sa duwa, apan sa kalit lang mipabuto kini og 20-4 nga rally, walo niini gikan ni Allen ug unom usab ang nahimo ni Rajon Rondo.