SAMTANG nagkaduol ang away, nagkamubo sab ang gihatag ni American trainer Freddie Roach kabahin sa kon unsa nga round palukapahon ni pound-for-pound champion Manny Pacquiao si Ghanaian Joshua Clottey sa ilang panagharong karong Marso 14 sa Dallas Cowboys Stadium.
Gikan sa desisyon lang nga kadaugan, ang prediksyon ni Roach nius-os sa 9th round knockout unya ning bag-uhay lang, nikanaog pa gyud kini sa 6th round knockout.
“Six or seven rounds,” matod pa ni Roach sa usa ka interbyu nga napatik sa www.philboxing.com.
Giusab ni Roach ang iyang prediksyon kay iyang nakita kon unsa na ka grabe ang kondisyon ni Pacquiao sa hinapos nga bahin sa ilang training sa Wild Card gym sa California.
“Manny looked very, very sharp today,” matod ni Roach.
Nagtuo si Roach nga makaparang lang og insakto si Clottey sa mag-unang upat ka rounds ug human niini, hayan modinar na gyud ang kusog ug kaabtik ni Pacquiao.
Karong adlawa, mo-sparring si Pacquiao og upat na lang ka rounds dayon molarga na siya paingon sa Dallas.
Sa laing bahin, giangkon ni Clottey nga naghandom gyud siya sa pagtagad nga nakuha ni Pacquiao gikan sa mga tawo sa nagkalainlaing suok sa kalibutan.
Sa documentary show nga The Road to Dallas, nga gipasalida sa US television, nagkanayon si Clottey nga gusto gyud niyang masinati ang nasinati ni Pacquiao.
“I want it to happen again,” matod ni Clottey, kinsa mosuway pag-ilog sa World Boxing Organization (WBO) welterweight title ni Pacquiao.