SUPERBALITA CEBU

Bata napaig sa sunog sa Lapu-Lapu

CEBU. Wa na maluwas ang 5-anyos nga si Mon Harry Anhao nga taga-Sityo Agus Proper, Brgy Agus, Lapu-Lapu City sa dihang mi-ulbo ang sunog sa ilang balay. (Tampo nga hulagway gikan ni Ariel Berdon)

NAPAIG ang usa ka 5-anyos nga batang lalake human nasunog ang ilang gipuy-ang duha ka andanang panimalay sa Agus Proper, Barangay Agus, dakbayan sa Lapu-Lapu, pasado alas 9:00 sa buntag kagahapon, Lunes, Septiyembre 23.

Ang nakalas nailhang si Mon Harry Anhao, kinsa giingong wala na makagawas sa ilang panimalay dihang miulbo ang sunog.

Matod ni FO2 Christian Clyde Tacandog, ang imbestigador sa Lapu-Lapu City Fire District nga nagsugod ang kayo sa panimay sa usa ka Inoferio Anhao uyoan sa napaig nga bata.

Dos minutos human madawat ang alarma alas 9:17 sa buntag, dali nga nakapasirit sa ilang hose ang kabomberohan hinungdan nga wala ra makakatap sa kasikbit nga mga panimalay ang sunog.

Giingong ang napaig nga bata mao ra ang nahabilin sa ilang panimalay niadtong tungora sanglit ang iyang amahan nangusinero sa ilang karenderya nga anaa ra usab mahimutang pipila ka metros gikan sa ilang pinuy-anan.

Giingong natulog ang bata dihang miulbo ang sunog.

Nakamata unta kini dihang nidako ang kayo ug nanawag pakitabang sa iyang amahang si Freddie Anhao, kinsa dali untang midagan sa ilang pinuy-anan gikan sa gialagarang karenderya dihang miulbo ang sunog.

Apan uwahi na ang tanan kay wa na makagawas pa ang bata sanglit dako na kaayo ang kayo. Nasamad pa ang kamot ni Freddie aron lang unta nga maluwas ang iyang anak.

Sa inisyal nga imbestigasyon, posibleng electrikal ang hinungdan sa sunog gikan sa nag-andar ang electric fan sa kwarto sa bata.

Gibanabana nga P120,000 ang danyos sa sunog. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph