SUPERBALITA CEBU

Negosyante patay sa ambush

CEBU. Usa ka 49-anyos nga negosyante ang napatay sa dihang gibanhig kini atubangan sa usa ka dakong mall sa may Dalan J. Luna sa Barangay Mabolo, Dakbayan sa Sugbo. (Hulagway kuha ni Alan Tangcawan)

USA ka 49-anyos nga negosyante ang napatay sa dihang gibanhig kini atubangan sa usa ka dakong mall sa may Dalan J. Luna sa Barangay Mabolo, Dakbayan sa Sugbo niadtong Dominggo sa gabii, Septyembre 22, 2019.

Nailhan ang biktima nga si Jeffrey Gomonit, nga nagpuyo sa Barangay Looc, Dakbayan sa Mandaue.

Sigon ni Police Lieutenant Pablito Saldo, deputy precinct commander sa Mabolo Police Station, nagsakay si Gomonit sa iyang puti nga sport utility vehicle pasado alas 9 sa gabii.

Sa dihang niagi kini tungod sa usa ka dakong mall sa Barangay Mabolo, kalit gitaparan ang iyang awto sa duha ka lalaki nga nagsakay og motorsiklo.

Puros nakataptap ug naka-full-faced helmet ang duha ka lalaki.

Sa dihang wala pa naka-abante ang awto ni Gomonit, kalit kini gipaarakan sa usa sa duha ka lalaki sa wala pa kini nisutoy.

Patay na si Gomonit sa dihang napalgan kini sa mga imbestigador.

Sigon ni Galia Gomonit, asawa sa biktima, gikan nakig-meeting ang iyang bana sa usa ka dakong mall sa Dakbayan sa Mandaue sa wala pa kini banhiga.

Matod ni Galia nga nalambigit sa hauling business ang iyang bana nga lumad taga Zamboanga.

Gitug-an sa hepe sa Mabolo Police Precinct 4, Police Captain Dexter Basirgo, duna na silay gisubay nga persons of interest nga mastermind sa pagpatay ni Gomonit.

Kalabot sa gunman, wala pa silay matumbok kon kinsa ang nagpatay sa negosyante.

Nagtuo si Basirgo nga kon madakpan ang mastermind, motug-an usab kon kinsa ang iyang gikontrata sa pag patay kang Gomonit.

Samtang gitutokan na sa kapulisan ang anggulo sa negosyo nga maoy posibleng motibo sa pagpamusil sa biktima.(BBT/ANV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph