SUPERBALITA CEBU

Mongaya: Hazing

Panahom

HANGTOD karon, naa pa diay gihapon kining gitawag og hazing diha sa Philippine Military Academy (PMA).

Nabonggo kini dihang namatay si Cadet 4th Class Darwin Dormitorio, 20, human nireklamo og sakit sa tiyan. Nasayran nga duna siyay mga bun-og nga klarong resulta sa hazing.

Sa ngadto-ngadto, nahibaw-an nga tulo ka mga upperclassmen ang responsible sa iyang kamatayon.

Alang kanako, sistema na sa ingong pagdisiplina sa mga bag-ong kadete kining gitawag nga hazing.

Ambot, dugay na man unta ang balaod batok sa hazing. Apan bisan sa PMA nga tunghaan alang sa mga opisyal sa atong armadong kusog, gipahigayon kini.

Kon maghisgot kitag hazing, makaingon ko nga pareho lang kining mga honorableng sundawo ug ang mga gang.

Kay naa man kini sa PMA sukad ka sa una, mao nga di kahibudngan nga daghan gyud ang mosunod.

Gani, makahinumdom pa ko nga kaniadtong high school ug college. Ang mga istorya kabahin sa hazing usa sa rason nganong wala ko mo-apply pagka CAT ug ROTC officer. Ug nakumpirmar nato kini kay mapasigarbuhong manabi man ang mga nakaagi.

Feeling nila, mas ngilngig sila kay nakaagig kulata.

Hunahuna nako, mao diay nga walay kasingkasing nga mo-tortyor ang mga sundawo ug kapulisan kadtong panahon sa diktador.

Ang hazing usa sa mga hinungdan nganong dako ang akong kalipay dihang gi-abolish ang ROTC. Hinuon, naa pay laing rason nganong nalipay ko nga nawala ang ROTC. Mao kini ang kurapsyon.

Makapasar man ang usa ka kadete nga walay apil-apil sa formation basta mopahinungod sa commandant ug mga ROTC officers.

Sayo kaayo ma-expose sa binuang ang atong mga tinun-an.

Kon gusto man ang administrasyon nga mabalik ang ROTC, makakuha lang kini sa akong suporta kon makumbinser ko nga mawala ang hazing ug di mabalik ang pangurakot.

Sa hisgutanan sa pangurakot, dili makadasig ang nahitabo sa Bureau of Corrections kun BuCor.

Nisuporta baya ko ni Sen. Bato dela Rosa. Apan, wala pa man gud ko makabawo sa dakong anomaliya sa BuCor. Sakto man tong giingon sa usa ka student leader nga samtang ang mga kabus gipangtokhang, ang mga aduhang nakumbikto ug napriso na sama sa rapist ng si Antonio Sanchez, pagawson. Si Sen. Bato mismo niangkon nga nakapagawas siya og usa ka druglord.

Kabahin sa hazing, angayang undangon na kini labi na diha sa PMA.

Matod pa ni Senador Ping Lacson, malooy siya sa mg kadete nga gitumbok nga nakapatay kang Cadet Dormitorio.

Mahimo silang silotan og pagkapriso sa tibuok kinabuhi gawas sa mga silot nga administratiba. @anol_cebu sa Twitter


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph