REKLAMO. Daghan ang motorista nga miangal sa bag-o nga pamaagi sa trapiko nga gipatuman kagahapon sa dakbayan sa Mandaue diha sa UN Avenue, nga nagkonektar sa ikaduha nga tulay padulong sa dakbayan sa Lapu-Lapu city. Hinuon, basta dunay kausaban nga pagahimuon sa bisan unsa nga butang duna gyuy moreklamo.
Apan grabe ang kahuot sa trapiko sa Paknaan, Mandaue city, pung pa ni Connie Fernandez-Brojan, usa sa mga editor sa CDN Inquirer.net. Matud pa ni Connie, sa iyang post sa Facebook, 30 minutos siyang nababoy sa Paknaan. Nagpasalamat siya sa bag-o nga pamaagi sa trapiko nga gipatuman kagahapon. Ang Brgy. Paknaan mao ni ang nagsumpay sa Cansaga Bay Bridge, Consolacion.
Kaniadto nga wala pa giusab ang dereksyon sa trapiko sa UN Avenue di man mabara og 30 minutos ang dagan sa mga sakyanan gikan sa Paknaan ug sa Cansaga Bay Bridge nga mopadung sa dakbayan sa Mandaue ug Cebu City tungod kay molahus ra man sa DM Cortes Avenue ginamit ang traffic lights diha sa interseksyon.
Basin og nagdaginot sa korente ang dakbayan mao nga gipawong ang traffic lights.
Sa bag-o nga traffic scheme, ang mga sakyanan ra nga gikan sa dakbayan sa Lapu-Lapu ug mga sakayanan padung sa Norte nga mituyok ilawom sa ikaduha nga tulay nga gikan sa DM Cortes Avenue ang makaagi sa UN Avenue. Lakip na niini ang mga sakyanan padung sa Lapu-Lapu city nga gikan sa Pacific Mall nga nagsubay sa UN Avenue.
Sa maong bag-o nga dereksyon sa trapiko, luoy ang mga motorista nga gikan sa Paknaan ug Cansaga Bay Bridge (Consolacion) nga mopadung sa dakbayan sa Mandaue ug Cebu kay di na makalahus sa DM Cortes Avenue nga mokonekta sa Ouano Avenue sa reclamation sa Mandaue nga nagsumpany sa dakbayan sa Cebu.
Ang mahitabo, ang mga sakyanan nga gikan sa Paknaan ug Cansaga adto na magpunsisok sa P. Burgos street ug sa interseksyon atbang sa Pacific Mall nga pirmi nga puno nang daan sa mga sakyanan nga gikan sa Cebu city ug sa Norte nga nag-agi sa highway.
Ang di madawat sa mga motorista ug sa kadaghanan ang rason nga giluwatan sa hepe sa TEAM (Traffic Enforcement Agency of Mandaue) nga kining bag-o nga traffic scheme alang ni sa mga motorista ug biyahedor nga gikan sa Mactan International Airport aron di sila malangay sa ilang destinasyon.
Unsa na lang intawon kadtong mopadung sa Airport? Kinsa man diay ang nagdali? Ang kadtong mga miabot na gikan sa biyahe o ang mopadung pa sa airport nga nag-apas nga makasakay sa ayroplano?