Nalzaro: Librihon na lang ang mo-renew sa lisensiya
SI CEBU City south district Councilor Eugenio Gabuya Jr., kinsa kaalyado sa Bando Osmeña Pundok Kauswagan (BOPK) misang-at og ordinansahon nga maghatag og incentive ngadto sa mga public utility jeepney ug taxi drivers nga walay traffic violations sulod sa lima ka tuig nga validity sa ilang driver’s license. Ang iyang ordinansahon nga giulohan og “An ordinance granting cash reward in the amount of P10,000 for qualified drivers of public utility jeepneys and taxis who did not incur any traffic violation upon renewal of his/her driver’s license and appropriating funds thereof.”
Kining atong gobiyerno, national ug local nga pangagamhanan, mo-imponer og bulihisan ngadto sa katawhan base sa ilang income ug propiyedad aron gamiton sa kagamhanan sa mga proyekto niini. Walay kagamhanan nga mobarug kon dili mangulekta og buhis gikan sa katawhan. Mao nga kanunay natong gipahimangno sa mga namunuan ning atong pangagamhanan nga ayuhon paggamit ang makulektang buhis. Dili wari-warion sa paggasto.
Apan kining uban natong mga pulitiko, gumikan ba kaha sa ilang political interest, magpataka na lang og pasar og mga balaod nga maghatag og incentive sa piniling sektor aron lang ingnon nga sila maoy “kampeyon” sa publiko. Daghan nang sektor ang gipanghatagan og mga benipisyo sa kagamhanan sama sa mga senior citizens, persons with disability ug single parent.
Karon nia na sab ning plano ni Gabuya. Unsa man ang iyang tumong? Aron lang gyud dili mo-commit og traffic violation ang mga public utility vehicles drivers kay nag-apas sila sa incentive? O dili sila mo-commit kay misunod sila sa lagda.
Aduna koy sugyot ni Konsehal Gabuya.
Una, nganong dili man lang nato librihon ang mga aplikante og drug test pinaagi sa Cosap o eye examination pinaagi sa doktor nga i-hire sa City Hall? O ba kaha librihon na lang tanan sa bayranan sa renewal sa driver’s license. Mokabat lang ngadto sa P1,500 lang ang magasto sa pag-renew. Gamay ra kana itandi sa P10,000 nga incentive. (bobbygnalzaro@gmail.com)