USA ka seryusong alegasyon nga angay hatagan og igong aksiyon sa administrasyon ni Presidente Rodrigo Duterte kining gibisto ni Baguio City Mayor Benjamin Magalong.
Sa usa ka executive session sa senado sa uwahing bahin sa niaging semana, si Magalong, retiradong police general ug kanhi director sa Criminal Investigation and Detection Group (CIDG), way lipod-lipod nga mibunggo ngadto sa mga senador kalabot sa mga opisyal sa kapulisan kinsa konektado sa mga tigpayuhot sa gidiling drugas sa nasod.
Iyang giyagyag nga adunay maniobra sa mga nasakmit nga binultong drugas diin may kalambigitan ang mga nahisgutang opisyal. Matod pa nga ipamalik ra usab diay kini og baligya.
Ang laing makapakurat nga gipalanog ni Magalong atubangan sa senado mao ang giingong mag-ilog ang mga selda kon dunay intsik nga drug lord nga dad-on sa Bureau of Correction pinaagi sa bidding.
“May darating na ililipat na Chinese drug lord d’yan, parang may bidding. ‘Yung mga gangs diyan nagbi-bid sila na mapunta sa kanila ‘yung Chinese lord na yan. Palakihan sila sa pera. At ‘yung perang pot money, ‘yan ho ay paghahatian sa mga opisyal dun at mga empleyado,” matod ni Magalong sa interview sa TV Patrol.
Ang makapanglibawot sa balahibo sa giyagyag sa mayor sa Baguio mao nga adunay mga konbiktado nga pagawason aron maoy mobaligya sa mga drugas, mopatay ug mohimog uban pang mga krimen, ilabi na og hinangat ang eleksiyon. Buot ipasabot nga adunay pulitiko nga nalambigit.
Kini maoy usa sa mga dagkong rason kon nganong hangtod karon nagpadayon gihapon ang grabing pagkatap sa gidiling drugas sa nasod.
Hinaot nga kini maoy tutukan ning nahabiling tulo ka tuig sa dili pa mapupos ang termino ni Presidente Duterte.