MGA duwa karon:
5:15 pm- UC batok USJ-R (High School)
6:45 pm- UV batok USJ-R (College)
Magkrus og balik ang dalan sa finalists sa miaging tuig nga mao ang defending champions University of the Visayas (UV) Green Lancers ug University of San Jose Recoletos (USJ-R) Jaguars sa main game karong gabii sa Cebu Schools Athletic Foundation Inc. (CESAFI) college division sa Cebu Coliseum.
Mao kini ang labing unang panagharong og balik sa duha ka mga kampo human sa ilang kulbahinam nga finals series sa miaging tuig nga miabot og deciding Game 3.
Ning higayuna, parehong nawad-an og mga haligi ang duha ka mga kampo apan pareho gihapon silang adunay saktong ikabuga.
Nawala sa habig sa Green Lancers ni coach Gary Cortes mao sila si two-time MVP Rey Suerte ug Toto Segumpan.
Mas dakodako ang haw-ang nga tapakanan sa Jaguars ni coach Leodie Garcia gumikan kay ubay-ubay ang nawala kanila. Kini mao sila si import Segamars Ewenike, RJ Dinolan, Nichole Ubalde, Fletcher Galvez ug one-time MVP Jaybie Mantilla.
Sa kasamtangan, ang Green Lancers naggunit og 2-1 nga rekord samtang ang Jaguars adunay 1-2 nga baraha.
Gisugdan sa Green Lancers ang ilang kampanya pinaagi sa pagmakmak sa University of San Carlos (USC) Warriors, 74-53.
Apan sa ikaduha nilang duwa, ang Green Lancers gipakaging sa University of Cebu (UC) Webmasters, 72-64.
Bitbit ang sakit sa ilang kapildihan batok sa Webmasters, ang Green Lancers nagmangtas ug namungot ngadto sa Cebu Institute of Technology University (CITU) Wildcats, 105-65, sa labing ulahi nilang duwa.
Sa ilang bahin, ang Jaguars ningsugod sa kompetisyon pinaagi sa makutas nga kadaugan batok sa Wildcats, 72-67.
Human niini, nasugamak ang Jaguars sa duha ka sunodsunod nga kapildihan batok sa Warriors, 55-62, ug Webmasters, 64-81.
Basi sa resulta sa nangagi nilang mga duwa, dili ikalimod nga grabe ka inilog ang Green Lancers ning higayuna kumpara sa ilang pagpakig-enkuwentro sa Jaguars sa finals sa miaging tuig.
Sa laing bahin, ang high school defending champions UC Baby Webmasters makigkontra sa Partner’s Cup champions USJ-R Baby Jaguars sa premirong duwa. Ang Baby Webmasters adunay 3-0 nga rekord samtang Baby Jaguars naggunit og 0-2 nga baraha. (ESL)