GIBAHA og negatibong reaksiyon ang higanting Sugboanon nga si Greg Slaughter sa niaging pipila ka buwan, human wa kini makapakita og ayo alang sa iyang mother team - ang crowd-favorite Barangay Ginebra sa niaging PBA Commissioner’s Cup.
Tungod niini gidungog gilayon nga posibling i-trade sa Kings ang seven-footer nilang sentro nga gihamok usab og sunodsunod nga pagka-injured.
Pero taliwala sa mikatap nga mga pangagpas, ang lumad nga taga sityo Pandayan, barangay Basak, dakbayan sa Sugbo, wa matandog sa mga huhungihong.
Instead, ang first-overall pick sa PBA 2013 rookie draft, nahagit sa maong mikatap nga mga hungihong ilabi na sa social media.
Gihimakak man tuod ni Ginebra coach Tim Cone ang maong balita, apan si Slaughter sa iyang bahin mipadayag, nga kon og galing mahitabo man gyud, andam kini niyang dawaton tungod kay kanang trade kabahin na sa ilang professional career.
Nakasabot si Slaughter nga kining tanan nagagikan ra usab sa mga Ginebra fans human nga taodtaod na usab nga wala sila ka balik sa finals.
Gani pipila ka higayon nga permi lang silang ma-elimate sa quarterfinals round.
Gihulagway karon nga nabiyaan na kaayo si Slaughter kon itandi sa iyang counterpart dinhi sa Sugbo kaniadto nga si June Mar Fajardo.
Daghan man gud ang nagtuo, nga madala ngadto sa PBA ang mainiton nga rivalry tali ni Fajardo ug Slaughter sa Cesafi.
Kon kahinumdoman, niadtong 2009 si Slaughter maoy midominar ni Fajardo diin iyang napa-champion ang University of the Visayas (UV) Green Lancers batok sa University of Cebu (UC) Webmasters nga gipangulohan sa taga lungsod sa Pinamungajan, Cebu atol sa ilang championship series.
Nakalangkat man tuod og titulo si Fajardo ug ang Webmasters sa dihang wala na si Slaughter kay nibalhin na sa Ateneo de Manila didto sa Kaulohan.
Samtang si Slaughter nakakulit na og pangalan didto sa Kaulohan, ang 6-10 nga Fajardo wala pa mailhi sa mga dagkong lega sa nasod bisan pa man og duna nay mga timailhan nga migimaw kabahin niya.
Mao nga lisod tuohan nga sa ilang pag-abot sa Philippine Basketball Association (PBA), si Fajardo aduna nay lima ka MVP awards samtang si Slaughter wala pa bisag usa.
Mga bashers sa social media mihulagway kang Slaughter nga another making of EJ Feihl ug hinungdan sa ilang kasagmuyo gusto nila i-trade ang 7-0 nga sentro.
Pero lahi ang anaa sa alimpatakan ni coach Tim Cone. Determinado siya nga dili niya buhian si Slaughter, ug daw sa andam siyang mosakripisyo niini.
Siguro, gawas sa height, duna siyay nakita niini nga kaya niyang tarungon.
Ug niadtong Dominggo, mora og sakto si Cone sa iyang pangagpas.
Daw og sa nabalikan na sa iyang kompiyansa si Slaughter ug kamatuoran niini nga nakigkumboya siya sa import nga si Justine Brownlee aron kulatahon ang Alaska, 102-83, sa ilang unang duwa sa Governor’s Cup.
Samtang si Brownlee mitapos sa duwa nga may 30 puntos ug 21 ka rebounds, si Slaughter mipakli og 16 puntos ug walo ka rebounds.
Hinuon dili pa kini maoy igong sukdanan kay gawas nga bag-o pa siyang nakabalik og duwa, lupig man gyud sa tapad ang Alaska kon ikompara sa Ginebra.
Ari na nato matino kon masangka ba usab ni Slaughter si Fajardo mga tulo ka semana gikan karon. (jun.migallen22@gmail.com)