TUNGOD sa nagkaduol nga piliay sa Mayo 10, 2010, ang dakbayan sa Sugbo mopalit og lote nga balor P30 milyunes aron lang ugdokan og sports complex diha a north district nga mobalor lang og P4.4 milyunes.

Sus paita ning klase sa atong pulitika. Basta naay eleksyon sayon kaayong pagawason ang kwarta sa kagamhanan.

"The Manny Pacquiao Blog". Click here for stories and updates on the Filipino boxing champ.

Apan sa laing panahon, makalusot pa ang Camel sa mata sa dagum kay sa kwartang mogawas gikan sa gobyerno.

Ang dinagkong kwarta nga angayan unta ibutang sa maayong proyekto nga makatabang sa katawhan nga nanginahanglan adto lang ibutang sa kalingawan sama sa sports complex nga dili ang tanan makabenipisyo.

Migawas ning maong isyu sa dihang gisaway ni Brgy. Kon. Joel Garganera si Mayor Tomas Osmeña nga mopalit og lote nga balor P30 milyunes aron matukoran sa iyang sports complex nga P4.4 milyunes ra ang balor.

Wa kaha masayop is Mayor Tomas sa iyang arithmetic? Ang lote nga palitunon og P30 milyunes ang kantidad unya butangan lang og balig P4.4 milyunes nga sports complex. Susmaryosep!

Basi sa akong nahibaw-an nga kon ang balor sa yuta nga paliton sa gobyerno alang sa karsada mas mahal kay sa karsadang buhaton di ni mahimo kay ang Commission on Audit (COA) di motugot.

Naay mga miyembro sa konseho sa dakbayan sa Sugbo nga mga abogado. Di ko motuo nga ang konseho motubay lang sa gusto ni Mayor Tomas bisag supak ni sa lagda ug sa balaod.

Naay ospital sa dakbayan nga kulang sa himan ug nagkinahanglan og tambal apan tungod sa Mayo 10 nga piliay ang sports complex maoy gihatagan ni Mayor Tomas og prayoridad.

Ang mga traffic lights nga morag sobra na sa 20 ka tuig gikan sa paghatag ug pagtaud sa kagamhanan sa Australia wa hatagig atensyon sa mayor kay di man makita ang resulta di sama sa sports complex nga mahimo niyang madiskorsuhan unya.

Di ba makahibung ning hinanali nga desisyon ni Mayor Tomas nga paliton ang maong lote alang lang sa sports complex?

Dako-dako na gyud ang galastuhan ning umaabot nga piliay kay mopalit man og loteng mahal si Mayor Tomas.

Ang sports complex usa ka maayong proyekto kay makahatag man nig dapit alang sa pundok-pundok. Apan nganong wa man buhata ni sa dakbayan sa miaging mga tuig nga layo pa ang piliay?

Di ba makahatag ni og duda nga magdalidali og palit og lote nga balor P30 milyunes aron lang butangan og sports complex nga balor P4.4 milyunes nga haduol na kaayo ang May 10?

Oi, morag duna ni nagpaluyong katuyoan da! Hinuon storya pa man nang kang Mayor Tomas. Di pa angayan nga ikaguol ni Garganera, nga kontra sa pulitika ni Mayor Tomas.

****

DI PROBLEMA. Kaniadto sa wa pa ang Citom ug mga traffic enforcers hapsay man ang kadalanan bisag dyutay ra ang traffic policemen nga makit-an sa kadalanan nga magdirehir sa trapiko.

Nawala ang atong pulis sa trapiko gikan niadtong 1989 dihang gipamusil sila diha sa Colon sa Sparrow Unit sa NPA.

Tinuod makaapekto ang pagtangtang sa 30 ka traffic enforcers, nga matud pa gidudahan nga nangotong, sa dagan sa trapiko.

Pero kon ang mga pulis sa trapiko motrabaho lang mas epektibo sila kay sa traffic enforcers.

(elespinoza53@yahoo.com)