IGO lang nahiluna sa ikaupat nga dapit ang San Miguel Beermen human sila gipatapsingan sa Zhejiang Guangsha Lions, 89-91, sa inilugay sa bronze medal sa East Asia League Terrific 12 niadtong Dominggo sa Tap Seac Multisport Pavilion sa Macau.
Kanunay naggukod ang Beermen apan kanunay sab nilang gihudlat ang Lions hangtod na sa katapusang gutlo.
Gani nakaitsa pa og desperadong three-point shot ang usa sa mga import sa Beermen nga si Dezmine Wells sa pagtingog sa final buzzer nga mao unta’y magpadaog kanila kon nasulod pa kini.
Sa kadaugan, ang team gikan sa Chinese Basketball Association (CBA) nakadawat og $50,000 isip ganti. Si Wells, kinsa maoy gamitong import sa Beermen sa bag-o pa lang ningsugod nga Governor’s Cup sa San Miguel Beermen, nagpakatap og 33 puntos aron pangulohan ang 1989 Grandslam champions.
Ning sangkaa, nadugangan ang kalbaryo sa Beerman gumikan kay wala nakaduwa ang usa sa ilang mga sinaligan nga si Fil-German Christian Standhardinger gumikan sa angol niini sa tuhod.
Nag-uniporme unta si Standhardinger apan wala na lang kini giahat og pagpaduwa sa Beermen.
Ang Beermen daan nang ningkombati nga wala ang duha sa ilang mga sinaligan nga sila si June Mar Fajardo ug Marcio Lassiter, kinsa nagpaalim sa ilang tagsatagsa ka angol.
“It’s really hard to win games against those mighty teams with a lot of size,” matod ni Beermen coach Leo Austria.
“Maybe if Christian played with us (tonight), I think we might have finished third place.”
Ning maong torneyo, ningsalmot sab ang laing PBA teams nga mao ang TNT KaTropa ug Blackwater Elite apan pareho kining sayo nga nanamilit. (ESL)