SUKAD nadisgrasya ug namatay ang iyang bana nga construction worker, si Daisy nanglaba na lang sa mga sapot sa iyang mga silingan aron may ikabuhi ug ikapatungha sa tulo niya ka anak. Gamay ra ang iyang suhol, apan iya kining gidaginot sa matag adlaw nilang panginahanglan.
Apan wa magdahom si Daisy nga kabuangan siya sa sapian nilang silingan. Pulis ang bana ug usa ka dakong opisyal. Maestra ang asawa niini. Mag-away kini sila kanunay kay selosa kaayo ang asawa niini. Ang wala niya mauyuni kay hilom nga midiga ang pulis nga bana diha kaniya. Gihagad siya sa pagpanuroy ug mangaon sila sa iladong fastfood sa dakbayan sa Sugbo.
Nakapamalandong si Daisy nga himababaye gyud ang banang pulis. Mao nga ang asawang maestra hilabihan makaduda ug makaselos niini.
Sulagma karon nga may nahibaloan siyang dugang kamatuoran sa kauwagon sa banang pulis. May nakuotan siyang gamayng papel sa luyong bulsa sa unipormeng pantalon sa pulis. May one-by-one photo pa gyud.nga gisukip sa pinilong papel. Ang mensahe sa batan-on ug guwapa kaayong babaye nga magkita sila sa motel ug magdala ang pulis sa gikasabutan nilang kantidad. Iya ba kining itug-an sa maestra nga asawa? Pito ang mga anak sa magtiayon niyang silingan. Mabungkag ang banay kon manghilabot siya.
Nagpakahilom na lang si Daisy. Apan daw turo ang banang pulis kay sungagon man siya sa mga sungay niini.Gitunolan siyag sapi sa pulis sa tagong dapit ug giingnan, “Bonus na sa imong pagpanglaba. Ug aron malingaw ka, manuroy ta. Anugon nang kaguwapa mo kon wa nay mosimhot. Magkita ta didto sa giingon kong fastfood.”
Gipugos siya sa pagdawat sa sapi. Apan wala siya moadto sa dapit nga giingon sa puis. Mibiya siya uban sa iyang mga anak paingon ngadto sa halayong lungsod sa Sugbo diin siya matawo ug magdako. Adto una sila mopuyo sa balay sa iyang ginikanan ug motabang sa pag-uma sa ilang yuta. (KATAPUSAN)