NAKAKITA na mo sa “Rambo: Last Blood” ni Sylvester Stallone? Lingaw no?
Wa ko magmahay kay sama sa nangagi niyang Rambo series action-packed gyud.
Naa koy koleksyon sa iyang mga pelikulang Rambo sukad niadtong 1982 sa iyang First Blood. Sa edad karon nga 73 mas nisamot pa kabangis si Stallone sa “Rambo: Last Blood.”
Gamay ra ni siya og score sa critics review tungod sa mga buslot sa estorya. Apan sa audience review taas siya og score.
Atangi ang katapusang 30 minutos sa maong pelikula kay makapakitbi sa atay ang mga eksena as in mao diay R-16.
Gusto mo’g spoiler? Ah giputlan ra gud niyag ulo ang iyang kontra samtang ang usa gikuhaan niya og kasingkasing. Haha...
“Huling tapatan”
Nagsugod na ang “Huling Tapatan” (grand finals) sa Tawag ng Tanghalan (TNT) sa It’s Showtime gahapon pero sukad napahiran og kontrobersiya ang ilang kumpetisyon maorag daghan nang wa ganahi.
Bitaw, unsaon man na pag-justify sa mga hurado ang score nga 16.5% nga gihatag nila sa resbaker nga si Mariane Osabel batok sa 50% ni Mariko Ledesma?
Maayo untag nayabag si Osabel pero maayo man sad ni sa face-off round.
Kon nakabentaha man si Mariko dili sad tingali ingon ana ka dako ang diperensiya (16.5% vs. 50%).
Gituyo to sa mga hurado aron dili malabwan ang ilang score sa text votes kay dako man kaayog text votes si Osabel nga 50% samtang 33.74% ra kang Mariko.
Kay ang criteria 50% gikan sa text votes samtang ang laing 50% maggikan sa Hurados.
Daghan na ang nag-ingon nga panguwarta ra nang text votes. Mao bitaw.
Ang ending? Ni-back out si Mariko sa grand finals bisan og nakasud na unta siya tungod sa bashlash sa social media.
Boneless Lechon
Ang resulta diay sa atong anniversary promo atong ipatik dinhi sa Laysho sa adlaw mismo sa ika-25 nga anibersaryo sa Superbalita karong Oktubre 23.
Andam na ang atong GC sa atong Cebu’s Original Pork Belly. Gisiguro ni Ma’am Gladys nga safe gyud kay ang lechon belly nila gikan tanan sa Virginia.
Unsay African Swine Flu nga ugma mag-asal man gani si Wendy Mendoza kay birthday niya. Sa Starmall sa Lawaan, Talisay kuno ang pakal. Haha... Happy Birthday, Wen!