BANSALAN, Davao del Sur -- Suwerteng nakalikay sa kamatayon ang usa ka lalaki nga gibunalan og bara ang ulo samtang natulog atubangan sa tindahan human nadali paghatud ngadto sa ospital sa Purok Banikanhon, Barangay Poblacion Dos, alas 6:15 sa gabii, Dominggo, Septyembre 22.
Ang biktima nailhang si Jerson Capuyan, 25, ulitawo, nga molupyo sa Purok 7, Barangay Buenavista sa lungsod.
Si Police Major Rodante Varona, hepe sa Bansalan Municipal Police Station, nagbutyag nga mitahan na sa ilang buhatan ang suspek nga nailhang si Jernie dela Cruz, 18, ulitawo nga molupyo sa Purok Banikanhon sa mao gihapong barangay.
Sa inisyal nga imbestigasyon sa kapulisan, nasayran nga sa wa pa nahitabo ang insidente, nagkuyog pa ang suspek ug biktima sa pagtagay og ilimnong makahubog sa Alcala Store sa lugar.
Apan, misangko sa panaglalis ang ilang pagtagay sa ilimnong makahubog mao nga niuli ang suspek sa ilang balay sa dihang nakatulog na sa kahubog ang biktima atubangan sa maong tindahan.
Wa magdahom ang biktima nga mobalik ang suspek nga nagdala na og bara ug gipuspusan ang ulo.
Hinuon, daling nadala sa Viacrusis Hospital ang biktima apan gibalhin sa Southern Philippines Medical Center sa Davao City.
Gitataw ni Varona nga gihikay na nila ang tukmang kaso nga ipasaka batok sa suspek. (Orlando B. Dinoy)