Kinawat gisuksok sa bilahan

IGACOS, Davao del Norte -- Sakpan ang usa ka babaye nga gisuksok sa gisul-ob niyang panty ang mga kinawat niyang sinina sulod sa tindahan sa Babak, Island Garden City of Samal (Igacos) alas 11 sa buntag, niadtong Sabado, Septyembre 21.

Ang suspek giila nga si Amena Angcon Amedin, 25, dunay kapuyo, way trabaho ug molupyo sa Purok 4, Barangay Caliclic, Babak District.

Sa report nga nakuha gikan sa Davao del Norte Police Provincial Office, nasayran nga ang security guard sa Intercon Agency nga nadestino sa Igacos Multimart, midangop sa Igacos Police Station ug giindorso ang suspek nga si Amedin kinsa, sumala pa, nasakpan nga nanguha og mga butang sulod sa Multimart nga wa bayri.

Base sa inisyal nga imbestigasyon, ang suspek padung na unta mogawas sa tindahan apan sa dihang girekisa sa guwardiya, narekober gikan niini ang usa ka kolor yellow nga jersey shirt nga nagkantidad og P250 ug usa ka Speedo rash guard grey nga nagkantidad og P310 nga gisuksok sa panty.

Giingong gihabwa sa suspek ang kinawat nga sinina gikan sa iyang panty sa usa ka lawak sa Multimart sanglit nauwaw siyang himuon kini didto mismo sa entrance sa tindahan.

Suspek lakip ang narekober nga mga ebidensiya gikustodiya sa Babak Police Sub-station kon diin ang kaso gigunitan ni Police Corporal Jerramel Senillo.

Kasong theft kun pagpangawat ang gipasaka batok sa babayeng kiriwan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph