Nalzaro: Bakak ni Soc

KANIADTO puwerte gyud nakong biliba aning Mayor Soc Fernandez isip pulitiko ug isip magsasangyaw sa pulong sa Ginuo pinasikad sa Balaang Kasulatan. Usa ka Catholic faith defender kini si Soc. Nakadungog ko’g estorya nga kini si Soc dili gyud modawat og komisyon sa mga proyekto diha sa iyang dakbayan. Dili sama sa ubang mga pulitiko nga modemanda gyud og porsiyento sa ilang mga proyekto.

Diha kunoy usa ka kontraktor nga nihatag ni Soc og mahalon nga rubber shoes isip pasalamat sa maong kontraktor sa mayor kay nakakuha siya og proyekto. Apan wala dawata ni Soc ang sapatos ug iya kining gipapa-uli ngadto sa kontraktor. Yano lang ang kinabuhi ni Soc. Wala man gani kana siya makapatukod ug luhong balay.

"The Manny Pacquiao Blog". Click here for stories and updates on the Filipino boxing champ.

BAKAKON

Apan karon mora man og nakibrahan ang akong pagdayig ni Soc gumikan ning sobra kaayong paglaban anang iyang bulay-og ug salawayon nga anak nga si Joavan. Unya dili pa gyud ako makatuo nga mamakak na si Soc aron lang paglaban sa iyang anak. Maoy tigsangyaw sa pulong sa Ginuo unya mamakak sa katawhan. Nganong naka-ingon kong bakakon kini si Soc?

Sa iyang mga pulong-pulong diha sa Talisay, iya gyud nga i-singit ang isyo bahin ni Joavan. Iyang gi-awhag ang katawhan nga dili motuo sa media kabahin sa mga atraso sa iyang anak kay dili kuno kana tinuod. Unsa may buot ipasabot sa mayor nga ang taga media maoy naghimo-himo og estorya? Si dySS Reporter Gabriel Bonjoc, kinsa konsehal sa Barangay Poblacion, Talisay maoy lig-ong testigo aning pagkabakakon ni Soc kay diha si Gabriel sa dihang gipamulong kini sa mayor.

DEPENSA GYOD

Laing bakak ni Soc mao kining iyang panghimakak nga nilaban siya ni Joavan ug maoy mangita og paagi aron maareglo ang mga kaso sa iyang anak. Sa interview ni Gary Cabotaje sa Sun.Star Cebu gipanghimakak ni Soc nga iyang gitanyagan og kuwarta, balay ug trabaho sa City Hall ang mga reklamante batok ni Joavan.

Unsay wala tanyagi nga ang mga kabanay niadtong jeepney driver ug konduktor nga gipusil-patay ni Joavan, nagtrabaho naman diha sa City Hall. Mangatras kaha to sila og wala tanyagi ug aregloha ni Soc? Pastilan no, gi-apil pa mayor ang kuwarta sa mga magbubuhis sa Talisay aron lang pagdepensa anang iyang kuwanggol nga anak-anak.

(bobby@sunstar.com.ph)