ORMOC City, Leyte -- Kapin sa dos mil ka patisipantes ang misalmot sa Beachurero 2019 k ang dungan nga pagpanglimpyo sa kabaybayonan sa Ormoc, Sabado, Septiyembre 21, 2019.
Ang mga patisipantes gikan sa nagkalain lain nga tunghaan sa dakbayan, kapulisan, kasundalohan, coast guard ug mga civic organization.
Gipangulohan sa Nature Unlimited Leyte Outdoor Club (NULOC) ug Lokal nga Kagamhanan sa Ormoc ang maong coastal clean up agi og pagpartisipar sa international coastal clean up day.
Nitambong mismo si Mayor Richard Gomez ug mga konsehales ug mga kawani
Nagsugod ang aktibidad alas 6 ngadto sa alas 8 sa buntag diin ang pagpanglimpyo gikan sa Barangay Naungan paingon sa Barangay Macabug.
Matod ni Aileen Avilles sa NULOC, mas daghan karon ang niapil sa Beachurero diin miabot kini og 2,327 ka partisipantes.
“Ang beachurero karon mas daghan na gyod ang niapil, nindot kay ang attitude sa tawo towards environmental advocay mi-increase na gyod ila awareness.” matod ni Avilles.
Kaniadto kutob lang sa Camp Downes ang paglimpyo pero mas gipalapdan na kini karong tuiga.
Mas dagahan usab nga basura ang nakolekta sa maong aktibidad diin miabot kini og kapin upat ka tonelada.
Nagplano karon ang NULOC nga magbutang og mga trash traps sa kasapaan aron mapugngan ang paglahos sa mga basura sa kadagatan ug mas dali na kini makuha.
Usa ka fund raising ang gihimo sa NULOC ug REACT Ogmok alang sa maong proyekto diin dunay silay gibaligya nga pins nag tag P25,00 ug t-shirt nga tag P250 sa Trail Sign Outdoor atbang sa SM Center Ormoc. (JKDP)