DILI lang ang local government units (LGUs) apan lakip na ang publiko ang giawhag sa Environmental Management Bureau (EMB) 7 nga likayan kining open burning o pagda-ob tungod kay mao kini ang usa ka factor nga mograbe ang nasinati karon sa Sugbo nga transboundary haze phenomenon.
Matod ni Engr. Cindylyn Pepito-Ochea, hepe sa Environmental Education and Information Unit sa EMB 7 nga nisaka gyud ang air quality sa tulo ka mga Continuous Ambient Air Quality Monitoring Stations niini, itandi sa normal ra nga mga makolekta nga datus nila.
“We can say nga naa gyuy external factors nga ginatan-aw pero di man gud nato ma-control ang external sources sama aning transboundary haze nga atong na experience karon. Mao nang as much as possible ma-control pud unta nato ang atong mga local sources, kana ganing usahay mag-daob taga hapon kay pawala sa lamok, maka-trigger samot, open burning.”
Dugang ni Ochea nga gipahibawo na nila ang ilang mga partner LGUs nga panghingusgan kining kampanya batok open burning activities.
Gihangyo ang mga local government unit nga gikinahanglan ang subsob ang monitoring sa open burning activities.
Sa 24 oras nga monitoring sa EMB 7 sa Talisay Station nila sa Particulate Matter (PM) 2.5 niadtong Dominggo sa hapon, Septiyembre 22, niabot sa 42.55 microgram per normal cubic meter ang natala nila.
Nasayran nga anaa lang sa 50 micrograms per normal cubic meter ang safe guideline value niini.
Kini nagpasabot nga duol na sa safe level ang maong air quality nga unta nga wala pa ang haze anaa ra kini sa 15-30 microgram per normal cubic meter sa inadlaw-adlaw.
Samtang sa Mandaue ug Cordova station niini nga anaa sa PM 10 nga abog ang gi-monitor, natala kini og good ug fair nga resulta.
“Good” alang sa kalidad sa hangin sa Cordova nga anaa ang ekipo nahimutang sa Municipal Hall diin anaa sa 49.97 microgram per normal cubic meter ang natala ug “Fair” alang sa kalidad sa hangin sa Talisay nga anaa sa City Hall nahimutang ang filter niini diin anaa sa 92.75 microgram per normal cubic meter ang natala.
Alang sa PM 10, anaa sa 150 microgram per normal cubic meter ang safe guideline value niini.
Kon ihulagway ang abog mga PM 2.5 ug PM 10 dili na kini makita sa tawo.
Dugang ni Ochea nga mograbe ang abog sa haze matag peak hours o kining bugnaw ang panahon.
Mao kini ang mga oras nga 5:00 hangtod 9:00 sa buntag ug 5:00 hapon hangtod 7:00 sa gabii. Ang Forest Fire sa Sumatra, Indonesia mao ang hinungdan niining haze.
Usa unta sa makatabang nga malimpyohan ang hangin kining kusog nga uwan apan walay uwan nga nasinati sukad namatikdan kining haze. (HBL)