CEBU City Mayor Edgardo Labella mipadala og suwat ngadto sa Metro Cebu Water District (MCWD) board aron mapahibawo nga ang iyang buhatan nagpadayon sa negosasyon sa private firm aron maoy mo-supply sa 100 million liters per day gikan sa desalination plant.
Gipasabot sa mayor mao ang consortium sa Metro Pacific Group of Companies ug Aboitiz Group nga giingong gi-triple o labaw pa ang presyo sa kasamtangang supply sa tubig nga gipalit MCWD.
Ang mayor gusto nga makigtagbo sa mga opisyal sa MCWD kinsa apil sa negusasyon sanglit iyang gihulagway nga kon adunay pirmahan nga kontrata sa water district hayan mosaka ang presyo sa tubig matag cubic meter maka-apekto kini sa mga Sugbuanon nga maoy ilang konsumidor.
“Considering that the proposal and any corresponding contract that may be entered into between MCWD and the proponents may have an impact on the price of water to the consuming public, I would to be apprised of the terms of the ongoing negotiation, the proposed price per cubic meter, as well as the status of the proposal,” tipik sa suwat ni Labella.
Ang mayor nangayo usab og kasayuran gikan sa MCWD kon giunsa nila paghatag og solusyon ang problema sa kakuwang sa tubig nga nasinati karon sa dakbayan subay sa mga reklamo nga iyang nadawat.
Gipadayag sa mayor nga isip amahan sa dakbayan sa Sugbo, obligasyon niya nga masiguro nga maprotektahan ang interest sa katawhan hinungdan nga kon adunay mga proposal nga posibleng makaapekto sa mga konsumidor sama sa pagtaas sa presyo sa nag-unang panginahanglan sama sa tubig kinahanglan nga masusi kini og maayo pinaagi sa sihag nga paagi.
“With this in mind, I trust that you will keep the interest of the Cebuanos paramount at all times and refrain from proceeding any further with this transaction,” matod ni Labella.
Ang public information officer sa MCWD nga si Charmaine Kara niingon nga ang negusasyon pinasubay sa Neda joint venture guidelines ug nipadayag nga wala pa silay kontrata nga gipirmahan.
“MCWD has no agreement or contract with the consortium or any party in relation to a bulk supply of 100 million liters per day of desalinated water,” matod ni Kara.
Ang MCWD board gipangulohan ni Joel Marie Yu isip ug iyang kauban silang kanhi city councilor Augustus Pe Jr., Atty. Ralph Sevilla, Atty. Cecilia Adlawan nga pulos tinudlo ni kanhi mayor Tomas Osmeña ug kanhi konsehal Procopio Fernandez nga tinudlo atol sa administrasyon ni kanhi mayor ug karon Bise Mayor Michael Rama. Sila adunay tag-unom ka tuig nga termino. (PAC)