GIAPUBOS sa kinalit nga drug test ang moabot sa 242 ka mga personnel sa City Traffic Management System CTMS sa dakbayan sa Lapu-Lapu kagahapon Lunes.
Sa kinatibuk-an 239 ra ang napaubos sa drug test sanglit ang adunay personnel nga giingong na ospital samtang ang laing duha giingong nangabsent.
Matod ni Garry Lao, ang executive director sa City of Lapu-Lapu Office for Substance Abuse and Prevention C-Losap, nga katuyoan sa padayong pagpaubos sa drugs test sa mga departamento sa City Hall mao ang plano sa kagamhanan nga makabaton ug usa ka drug free workplace.
Ang departamento nga walay magpositibo sa drug test nga ipahigayon sa C-Losap gikatakdang butangan og karatola sa gawas sa ilang buhatan nga natala: “This is a drug free workplace.”
Walay laing madawat ang buhatan nga mahimong drug free workplace apan magdepende ra kini ni Lapu-Lapu City Mayor Junard Chan kung mohatag siya ug pahalipay.
“It’s not about bonus or incentive. It’s ang katawhan, ang mga lumolopyo or publiko nga atong gialagaran. At least kampante sila nga moduol nga makaingon nga oy kining mga tawhana diri drug free ni sila much more ang mga traffic enforcers,” matod ni Lao.
Gikatakdang pangayoan ni Lao ug pasabot ang duha ka wala mo attend sa drug test sanglit klaro ug tataw sa memo nga gipadala sa CTMS nga adunay general assembly sa Hoops Dome kagahapon, Lunes.
Kun ugaling adunay mag positibo hayan posible gihapon kini nga tangtangon sa trabaho hilabi na nga tanan sa mga personnel sa CTMS pulos mga job order kun JO.
Ang CTMS maoy ikaduhang gipaubos sa drug test sa C-Losap sud lang sa duha ka semana human nga sa miaging semana ang City Disaster Risk Reduction and Management Office CDRRMO ang gipaubos usab sa drug test diin 2 ka mga personnel ang nag positibo.
Pulos na gitaktak sa trabaho ang duha apan giawhag sa pagpaubos sa rehabilitasyon hilabi na kun planong mangapply pagbalik sa city hall. (GCM)