Citi Center tukoran og kapuy-an sa urban poor

GAMITON sa Cebu City Government isip social housing site ang dakong hawan sa Barangay Kamagayan nga kanhi Citi Center nga karon gihimo isip utility vehicle terminal sa mga van for hire.

Gumikan niini, gibalibaran sa Siyudad pinaagi sa City Legal Office ang hangyo ni Barangay Kapitan Raquel Avila nga gamiton unta ang lugar nga tukoran og covered court nga magsilbing evacuation center ug ubang kalihukan.

Si Atty. Rey Gealon, pangulo sa CLO, nagkanayon nga ang maong luna giila ni Atty. Jose Daluz III nga lakip sa tukoran og medium-rise-building (MRB) para mga kabos nga walay balay nga nagpuyo sa siyudad.

“Atty. Daluz mentioned that the lot is among the sites identified for the construction of medium-rise-tenement building for the City Socialize Housing Program,”tipik sa suwat ni Gealon nga gipadala ngadto ni Mayor Edgardo Labella.

Ang City Legal Office nidugang nga makapadayon og gamit ang barangay Kamagayan sa kanhi Citi Center sama sa padayon nga pag-operate sa UV terminal apan walay tugotan nga makapabarog og bag-ong edepisyo sama sa covered court.

Si Labella nipadayag dihang gipahigayon ang groundbreaking sa P230 milyones nga MRB sa Barangay Lorega ug kini maoy subayon nga template sa Cebu City inay manghatag og yuta ngadto sa mga beneficiary mas daghan pa ang makabenepisyo sa pagtukod og edipisyo nga mas bintaha para sa katawhan ug sa gobyerno.

Si Labella naglaraw usab nga motukod og MRB didto sa sityo Alaska diin niulbo ang sunog sa niaging semana.

Ang mayor niingon nga para matuman ang pagtukod og daghang MRB, kinahanglan nga makolekta sa Cebu City ang five percent nga bahin sa local government unit sa mga construction sa condominium ug 20 percent para sa mga subdivision nga nalatid sa Urban Housing and Development Act.