DAKONG posibilidad nga away sa negosyo maoy nagpaluyo nga motibo sa pagbanhig-patay ni Jeffrey Sanchez Gomonit, 46, sa dalan Juan Luna, Barangay Mabolo, siyudad sa Sugbo niadtong Dominggo, Septiyembre 22, pasado alas 9:00 sa gabii.
Mao kini ang gisubay nga anggulo sa pagbanhig ni Gmomonit, minyo ug nagpuyo sa Felisita Village, Barangay Looc, siyudad sa Mandaue, apan lumad nga taga Magsaysay, Zambanga del Sur.
Si Police Captain Dexter Basirgo, hepe sa Mabolo Police Station, nga sa wala pa mahitabo ang pag pamanhig ang biktima, diha kini sulod sa usa ka simbahan uban sa iyang pamilya, adunay tawo nga kanunay nga nanawag sa iyang mobile phone.
Ang maong tawo iyang kasosyo sa negosyo, sigun sa asawa sa biktima, giingong nakig-meeting kini sa Park Mall sa Mandaue.
Tungod niini, nagduda si Basirgo nga gi-set-up ang biktima pinaagi sa kanunay niini nga pagpanawag sa phone.
“Naka-communicate pani sa iyang asawa then later nawala na nga mao nalang ang nahibal-an sa asawa nga gipusil na sa may SM so among gi-conclude nga gi-set up ni siya kay gitawagan aron pagkuha sa iyang whereabouts,” matod ni Basirgo.
Aduna nay ngalan si Basirgo kinsa ang maong business partner sa biktima apan nag dumili una kini pagtug-an sanglit ila pa kining ipatawag ug ipaubos sa imbestigasyon.
Ang negosyo sa biktima mao ang pag kuha sa mga kinawot nga yuta sa usa ka construction site diin sila ang mo labay niini.
Aduna siyay mga kasosyo sa negosyo nga gihulagway ni Basirgo nga dako nga matang sa negosyo tungod sa kadaghan sa mga gipangtukod nga building sa Metro Cebu.
Bag-o pa sa Sugbo si Gomonit tungod kay ang ilang negosyo sa kopras sa Zamboanga Del Sur dili na kayo kusog nga maoy hinungdan nga mibalhin sila dinhi aron magtukod og laing matang sa negosyo.
Nikooperar na ang asawa sa kapulisan ug nihatag kini og pin code sa cellular phone niini aron makakuha silag dugang impormasyon nga makatabang sa ilang imbestigasyon
“Cooperative man kaayo ang asawa kay siya pa gani ang mi sulti unsay pin code sa cellphone sa iyang bana,” dugang ni Police Captain Dexter Basirgo.
Ipasusi pa usab nila ang cellular phone sa biktima sa Anti-Cyber Crime Group 7 aron makakuha pa silag dugang impormasyon niini nga makatabang sa imbestigasyon.
Giangkon ni Basirgo nga duol ra kaayo sa police station ang nahitabo, busa dali nga niresponde ang mga pulis apan wala na kini maabti ang riding in tandem nga nisibat paingon sa North Reclamation Area.
Tulo ka buslot ang naangkon sa puti nga Mitsubishi Montero sa biktima gamit ang wala pa matino nga kalibre sa armas.
Gituohan nga sa Mandaue City gisundan na sa duha ka suspek ang biktima apan wala lang kini makahigayon sa maong siyudad ug didto na naabti sa SM sa dihang naka stop signal ang traffic ligh.
Walay CCTV camera sa lugar apan, matod ni Basirgo, nga ilang i-back track ang gi agian sa biktima gikan sa Mandaue sanglit siya nagduda nga gisundan kini gikan sa mall diin sila nag-meeting.