GIPASAKA na ang tulo ka mga kaso batok sa upat ka mga batan-ong lalake nga nag video sa hubog nga dalagita sulod sa usa ka pribadong sakyanan nga gi-upload sa social media.
Ang mga kaso nga gipasaka sa mga sakop sa Women and Children Protection Desk sa Cebu City Police Office mao ang acts of lasciviousness, anti photo and video voyeurism act ug ang pagpanglugos.
Matod ni Police Colonel Gemma Vinluan, hepe sa Cebu City Police Office (CCPO) nga niadtong Dominggo, Septiyembre 22, gisubay sa mga imbestigador uban sa biktima ang giingong lawak sa lodging house diin didto siya gidala sa usa sa mga suspek ug gipahimuslan.
Nitug-an, matod pa, ang biktima nga tungod sa kahubog wala na siya masayod sa gipanghimo sa upat ka mga suspek sulod sa sakyanan apan sa iyang pagmata, didto na siya sa usa ka bugnaw nga lawak sa lodging house.
“Kase hindi ma-recall ng bata kung anong exact location dahil nung time naka inom siya, sinamahan sya ng WCPD namin sa isang lodging house daw allegedly,” matod ni Vinluan.
Niadtong Sabado, Septiyembre 21, ang inahan sa usa sa mga suspek ang nitahan sa iyang anak sa kapulisan sa siyudad sa Sugbo aron mapaubos kini sa imbestigasyon.
Kini nagpasabot lang, matod sa CCPO director, nga andam nga mokooperar ang mga ginikanan sa ilang mga anak nga adunay tulubagon sa balaod.
Wala hinuon dakpa ang maong menor de edad sanglit gipaagi na nila sa regular filing ang kaso ug ang prosecutor na ang mag-igo kung ila bang isaka sa korte.
Sa upat ka mga suspek, usa kanila ang gipasakaan sa kasong acts of lasciviousness, upat ang anti-photo and video voyeurism act ug usa usab ang kaso sa pagpang lugos.
Maampingon si Colonel Vinluan sa paghatag sa detalye sa mga suspek ug sa biktima tungod kay mga menor de edad pa kini.
Apan iyang gidugang nga ipaubos pa gihapon sa assessment ug discernment sa Department of Social Welfare and Development (DSWD) 7 ang upat tungod kay pulos kini mga menor de edad ang mga sinumbong.
Atol sa panawagan ni Police Brigadier General Debold Sinas sa miaging semana sa pagreklamo sa dalagita sa kapulisan, dali kini nga mibisita sa buhatan sa Police Regional Office (PRO) 7.
Uban sa biktima ang iyang maguwang babaye ug didto sa Regional Women and Children Protection Desk 7 iyang gitug-an kinsa kadtong upat ka mga lalake nga tinun-an sa managlahing unibersidad sa siyudad sa Sugbo nga Makita sa video.
Ang mga suspek pulos pa nagtungha isip mga senior high school ug giingong manag barkada.
Nailhan sila tagsatagsa sa biktima tungod sa mikatap nga video sa social media.
Dugang ni Vinluan nga nakahatag na sa iyang pinanumpaang pamahayag ang biktima uban sa iyang abogado.
Ggitumbok usab kinsa ang unang naka-upload sa video sa social media nga gi-share usab sa mga kauban niini nga niresulta sa pag-viral niini sa social media hinungdan sa kauwaw sa biktima.