NAKA-HOSPITAL arrest ang usa ka engineer human nakuhaan og armas niadtong alas 2:30 sa hapon Sabado, Septiyembre 21, sa Punta, Barangay Macabalan, dakbayan sa Cagayan de Oro.
Kasamtangang anaa sa intensive care unit (ICU) si engineer Arnolfo Magadan, 49, minyo, ug empleyado sa Department of Environment and Natural Resources (DENR)-Northern Mindanao isip chief survey and control section.
Sa nahipos nga impormasiyon gikan sa kapulisan, gikabutyag nga nakadawat og taho ang personahe sa Police Station 5 (PS5) sa Macabalan ubos kang Police Captain Zean Paul Cubil kalabot na sa usa ka nakitang indibidwal nga nagtakin og armas.
Dali usab kining girespondehan sa mga otoridad ug gikumpronta sa dihang nakumpirma ang taho.
Nakuha gikan sa posisyon niini ang pistol alpha blue nga kalibre .40 nga nagdala og serial number nga A412100031 nga dunay pito ka mga buhing bala.
Atol sa kumprontasiyon, pakyas usab kini sa pagpakita sa mga legal nga dokumento samtang nagpahigayon og pagsusi sa dapit o land survey sa dunay panag-away sa yuta.
Gikumpirma usab ni Police Major Evan Viñas, tigpamaba sa Cagayan de Oro Police Office (Cocpo) nga naka “hospital arrest” kini human giingong gi-atake ug anaa sa Polymedic Plaza nga gibantayan usab sa kapulisan.
“Yes, as per report na ICU siya karon,” matud ni Viñas.
Kasamtangang gi-andam na ang tukmang kaso nga ipasaka batok kay Magadan.
“Violation of RA 10591 or Illegal Positionn of Fire Arms and ammo iya atubangon kaso,” dugang pa.
Kasamtangang anaa pa sa balay tambalanan ang maong dinakpan.