NAGDAGAN-DAGAN nga mitabok ang usa ka lalaki hinungdan nga nabanggaan sa pribadong sakyanan niadtong Agusto 2, 2018 mga alas 9:30 sa gabii sa National Highway, Kolambog, Barangay Lapasan, dakbayan sa Cagayan de Oro.
Naila ang namatay nga si Jonathan Nambatac, 31, residente sa sentro sa Kolambog, Lapasan samtang ang drayber naila nga si Amado Sales III, 33, nga taga Westfield subdivision ning siyudad.
Sa nahipos nga impormasiyon gikan sa kapolisan sa Police Station 3 (PS3) sa Agora, gikabutyag sa mga nakasaksi nga unang nakita ang biktima nga nitabok sa dalan nga nagdagan-dagan.
Giingong nadasmagan kini sa usa ka Toyota Hilux nga gimaneho ni Sales hinungdan sa hinanali niini nga kamatayon.
Sa bahin sa suspek, giingong daw wala sa hunahuna ang biktima.
Dali pa nga gidala sa Northern Mindanao Medical Center ning dakbayan ang biktima apan patay na kini dihang nahidangat.