GISUGDAN Lunes, Septiyembre 23, ang capsule laying ug groundbreaking sa mga dalan sa weste nga bahin sa Misamis Oriental.
Kini gipangunahan ni Misamis Oriental Governor Bambi Emano.
Unang groundbreaking ug capsule laying gipahigayon sa Poblacion, lungsod sa Libertad, Misamis Oriental kon asa gikatakdang tul-iron ang dalan sa Libertad-Tangcub-Lapad nga provincial road.
Kini nga proyekto mokantidad og P65,291,982.50.
Samtang sunod nga capsule laying natigayon sa Sampatulog, lungsod sa Alubijid, Misamis Oriental.
Kini aron pagpalambo sa dalan sa Alubijid-Calatcat-Tugasnon-Sungay Provincial Road nga mobalor ngadto sa Php 63,998,922.51 nga proyekto.
Tema sa maong kalihokan mao ang “Dalan sa Kabukiran ampingan, abot sa kaumahan mapuslan.”
Gibutyag ni Emano nga usa kini sa mga prayoridad nga proyekto nga itunol sa probinsya weste nga bahin kon asa mapadali ug mapasayon ang pagpaabot sa mga mag-uuma sa ilang mga tinikad ngadto sa sentro nga bahin.
Gawas niini nagtunol sab kagahapong adlawa si Emano sa P200,000 nga tseke alang sa Local Government Officials and Employees Cooperative sa lungsod sa Initao.
Lakip ang replica check nga P600,000.00 sa Barangay Calacapan alang sa katukoran sa phase 1 ug 2 sa Day Care center ug laing P50,000.00 ngadto sa Barangay Gimangpang alang sa usa ka financial assistance pagpalambo sa ilang turismo.
Lakip sa gitunolan og tseke kagahapong adlawa ang lungsod sa Binuangan, Misamis Oriental.