DAKPAN sa entrapment operation ang usa ka lalaki nga nagpatuong supervisor human nangilad ug nangilkil sa Malaybalay City, Bukidnon.
Balhog sa prisohan si Renheart Lijesta, 19, ulitawo, ug residente sa St. Peter, Malaybalay.
Sa imbestigasyon sa kapolisan sa Valencia City Police Station sa pagpangulo ni Police Lieutenant Angel Vergara, unang nagreklamo sila si Dunidon Destor uban ang laing biktima.
Kini human nagpatuo si Lijesta nga supervisor sa Bounty Fresh nga nakabasi sa Malaybalay City.
Giimbitahan niini ang mga biktima nga mo-aplay sa maong kompanya ug nipasalig pa sa mga benipisyo nga ilang madawat kon makasulod.
Apan, bugti sa niini nangayo kini og P2,000 matag usa ka kanila alang sa processing fee.
Tungod niini, mihatag sab ang mga biktima ug pasiunang P4,000 alang sa tulo ka tao nga mo-aplay, apan wala kini nahitabo.
Dihang ilang gisusi sa kompanya sa Malaybalay ang identipikasyon niini, nadiskubreng dili diay kini trabahante sa Bounty Fresh ug ngani wala diay kini trabaho.
Gumikan niini, gihimo sa kapulisan ang entrapment operation batok sa suspek.
Usa ka pulis nagpatuong mangaplay ug trabaho niini ug mihatag sa suspek og P1,000 ug positibong nadakpan kini.
Si Lenheart nagtingkagol na karon sa prisuhan sa Valencia City Police.