NADUSO kagahapon sa Trade Union Congress of the Phils. (TUCP) ang petisyon alang sa P100 across the board nga usbaw sa minimum nga suholan sa mga mamumuo sa Central Visayas.

Mga alas 9:30 kagahapon sa buntag dihang giduso ni TUCP representative Raymond Mendoza sa Regional Tripartite Wages and Productivity Board (RTWPB) ang ilang petisyon.

"The Manny Pacquiao Blog". Click here for stories and updates on the Filipino boxing champ.

Gihimong kapasikaran sa gipangayong usbaw mao ang maayo nang dagan sa ekonomiya sa nasod nga gipamatud-an sa pagsaka ngadto sa 1.8 percent growth rate sa gross national product, pagmahal sa mga nag-unang palaliton ug ang wa paghatag og usbaw sa suholan sud sa duha ka tuig.

“Ang mga economic indicators nagpakita nga maayo na ang dagan sa atong ekonomiya maong makiangayon lang nga hatagan nato og usbaw sa suholan atong mga mamumuo,” nagkanayon si Mendoza nga gikuyogan sa ubang mga opisyal sa ALU-TUCP sa pagsang-at sa petisyon.

Nanghinaot si Mendoza nga aksyunan sa wage board ang petisyon aron dunay mapaabot nga gasa ang mga mamumuo atol unya sa pagsaulog sa Labor Day karong Mayo 1.

Apan matod ni Dole regional director Elias Cayanong nga di siya makasiguro kon mahukman na ang petisyon sa di pa ang Labor Day kay matod niya moagi pa kini og proseso apil na niini ang pagpahigayon og sectoral consultation.

Matod ni Cayanong nga di pa tanang sector sa pamuo ang naka-recover maong angay masayran kon unsang sector ang mahimo rang makahatag og umento sa suholan.

Apan iyang gipasalig nga karong Huwebes atol sa ilang regular board meeting sa RTWPB ila nang tukion ang petisyon sa TUCP uban na sa naunang petisyon sa APL-Pialo nga niadto pang Disyembre giduso.

Si Eric Ng Mendoza, presidente sa Mandaue Chamber of Commerce and Industry (MCCI) niklaro nga wa silay supak sa paghatag og umento sa suholan apan ang gipangayo nga P100 delikado alang sa mga kapitalista kay matod niya di pa gyud kaayo lig-on ang ekonomiya sa nasod.

Matod niya nga dunay sector nga nakabangon na gikan sa global financial crisis apan duna say wa pa hingpit maulii maong kon duna may ihatag nga umento, kinahanglang sa kantidad nga kaya ra usab sa mga kapitalista.

“As management siguro, medyo subidahon pa na karon kay karong panahon especially sa export wa pa gyud maulii. As chamber head, among gusto motabang mi unsaon paghatag og daghang trabaho. As with the P100 nga wage increase I think di na motivating to hire more people,” angkon ni Mendoza. (CPL)