NINDOT ang National Voluntary Blood Program sa DOH.
Para kanako kini ang programa nga kinahanglang suportahan sa mga lokal nga kagamhanan ug sa katawhan tungod sa daghang kinabuhi ang masalbar sa donasyon nga dugo.
Busa usa ako sa kanunay mo-donate og dugo didto sa Red Cross ug nahimo pang Galloner sa DOH.
Matag tuig ang among parokya sa San Alfonso nagapahigayon og duha ka bloodletting ug gilikayan ko nga makapalta sa paghatag. Gani ako pa ang nag-facilitate sa strategic planning sa DOH Regional Voluntary Blood Program sa unang bahin sa 2000, kung wala ako masayop, didto sa Marco Polo nga gihatagan og pundo sa Philippine Business for Social Progress (PBSP).
Buot nga makahimo ang DOH og mga kabag-ohan sa ilang programa aron mas abli ang katawhan sa pagsuporta tungod sa panginahanglan sa dugo sa rehiyon.
Sa tinuod lang, lisod agnihon ang katawhan nga mohatag og dugo tungod sa kakulang sa pagsabot gawas nga masakitan sab ang mohatag og dugo. Tiaw mo'ng tusukon ka og dako nga dagom aron moapil sa programa? Tungod kay boluntaryo, wa say madawat nga bayad kondili pagkaon ug pag-inom og ferrous sulfate tablet pagkahuman sa bloodletting.
Kung maapil ka sa Galloner Club hatagan ka og T-shirt ug plaque of appreciation gikan sa DOH.
Nindot apan kulang pa gihapon kini nga maka-engganyo sa tawo nga mosalmot sa programa.
Busa kinahanglang i-promotar pa kini sa katawhan apil na ang pag-usab sa pamaagi ug kinaiya sa trabahante.
Usa sa mga usbunon nga akong nasaksihan sa dugay ko nang pag-apil mao ang pagpunay og mugtok sa mga kawani sa DOH. Kinsa kahay gusto moduol kanila kung nagsige lang og mug-ot nga mora'g way kalipay sa kinabuhi?
Maayo pa tingali ang bampira kay mopahiyom pa una motukob sa iyang biktima. Duna pay usa kanila nga tiguwang na ug nagmugtok sab ang dagway nga way konsiderasyon sa tawo.
Gamay ra kaayo ang kulang sa porma nga gipa-fill-up gipabalik pa gyud didto sa nag-interview kay kuno dili niya trabaho ang pagsulat sa petsa sa porma.
Nahitabo kini kanako niadtong Pebrero 28 sa among parokya. Wa lang mabutangi og petsa sa interview ug sponsor nga mao ang San Alfonso Parish. Medyo napikal pa siya nga akong gihangyo nga puwede ba nga sulatan na lang kay gibiyaan ko lang ang duha nako ka anak sa balay nga sila ra aron lang mo-donate og dugo. Di daw niya trabaho ang pagsulat ug ni-insister pa siya nga wa pa daw nako gipapirmahan sa nag-interview nga klaro man nga anaa sa porma sa unang pag-atubang nako kaniya. Mora'g ako pa ang namakak nga kung buot hunahunaon wa akoy makuha sa pagpamakak gawas nga boluntaryo kining akong gibuhat. Nangayo siya'g pasaylo nga gipabalikbalik ko niya apan sa akong kabahin angayan nang ihatag sa mga bag-o ug batan-on ang ilang trabaho kay mora'g gibug-atan na.
Ingon niining gagmayng sipyat unta dili makapalisod sa donor. Kinahanglang maayo motagad ug mapahiyumon ang mga nagdumala niining programa ilabi na kadtong moadto sa mga komunidad.