ANG Department of Agriculture (DA) sa lalawigan sa Davao del Sur nagkanayon nga wa pa sila nabalaka sa El Nino karon.

Kini maoy gisulti ni Ernesto Miro, provincial agriculturist, dinhi sa Sun. Star Superbalita dihang gihinabi sa telepono kagahapon sa buntag.

Matod ni Miro, nga hinuon padayon pa silang nangalap og mga datos gikan sa ilang mga municipal agriculturist sa mga kalungsuran.

"Anyway padayon pa man gud ang harvest season sa humay although ang ubang mga lungsod like Magsaysay humana," ni Miro pa.

Apan, gikumpirma ni Miro nga aduna gyud mga mais nga tanom sa mga mag-uuma nga nangamatay na gumikan kay wa makasugakod sa kainit sa panahon.

Sumala ni Miro, sa kasamtangan di pa ikabalaka ang hulaw sanglit ubay-ubay pa og tubig ang mga irigasyon nga nagpadagan sa mga basakan.

"Bisan ang gulayan nato sa Barangay Kapatagan, Digos ug Balutakay, Bansalan, OK pa man ang supply," tataw ni Miro.

"Pero kung di gyud ta makatagamtam og uwan karong Abril ug Mayo, kana medyo delikado na gyud kay planting season na dinhi, pero ato gyud ng gipangandaman," pasalig sa uwahi.

Karong ikatulong semana ning bulan, gitakda sa DA ang paglusad sa "cloud seeding" apan aminado sila nga gihuwat pa nila ang budget nga maaprobahan.

"Mangayo ta og counterpart sa Provincial Government unya motabang man pud ang Dasuseco (Davao Sugar Central Company)," sumala niya.

Dason niya nga inig human og harvest sa mga mag-uuma sa ilang basakan, mananom na sab sila og mongoes ug pakwan sanglit kini maoy alternatibong tanom karong ting-init.

"Katong mga dunay manggahan mas malipay sila karong ting-init kay paborito kaayo na sa mangga, so di sila apektado," niya pa.

Didto sa lungsod sa Magsaysay, Davao del Sur, gikanayon ni Vice Mayor Arthur Davin nga mohimo og lakang ang DA alang sa mga mag-uumang wa na makatanom og mais.

Gihimo na sab sa DA ang pagsubay sa kahimtang sa mga mag-uuma sa tibuok lalawigan human giingong adunay pipila didto sa lungsod sa Matanao, Davao del Sur, nga niingong apektado sila sa hulaw. (Orlando B. Dinoy)