SUGDAN sa San Miguel Beermen ang ilang kampanya alang sa ilang tinguha nga ikaduhang Grandslam title pinaagi sa pagpakigbatok sa Phoenix Pulse Fuel Masters sa main game karong gabii sa Philippine Basketball Association (PBA) Governor’s Cup sa Araneta Coliseum.
Apan gilaumang dili lalim ang sagubangon sa Beermen gumikan kay sugdan nila ang komperensiya nga wala ang tulo sa ilang mga sinaligan nga sila si June Mar Fajardo, Marcio Lassiter ug Christian Standhardinger nga pulos adunay angol.
Sila si Fajardo ug Lassiter daan nang adunay angol ug wala pa’y tino kon kanus-a sila makabalik og duwa.
Sa iyang bahin,si Standhardinger naangol (tuhod) atol sa kampanya sa Beermen sa East Asia League Terrific 12 sa Macau diin igo lang silang nahiluna sa ikaupat nga dapit.
Hinuon bisan pa niini, ang Beermen aduna gihapo’y igong ikabuga sa pagpangulo sa ilang import nga si Dez Wells, kinsa nagpakita og maayong duwa sa ilang kampanya sa Terrific 12.
Ikaparang ni Wells ning sangkaa mao ang naandan nang import sa Fuel Masters nga si Eugene Phelps.
Ang Fuel Masters mokombati sab nga adunay haw-ang sa ilang puwersa gumikan kay dili gihapon makaduwa ang usa sa ilang mga labing sinaligan nga si Calvin Abueva.
Si Abueva padayong nagserbisyo sa indefinite suspension nga iyang nadawat gumikan sa salawayonniyang nabuhat kaniadto.
Kini maoy ikaduhang duwa sa Fuel Masters ning maong komperensya.
Sa premiro nilang tahas, ang Fuel Masters nasugamak sa 116-123 nga kapildihan batok sa NLEX Road Warriors niadtong Sabado.
Sa premirong duwa, magsangka ang Blackwater Elite ug Talk N’ Text KaTropa nga sama sa Beermen, masubhan sab ning maong komperensiya.
Ang Elite ug KaTropa mao ang kauban sa Beermen nga ningkombati sa Terrefic 12 tournament.
Ning sangkaa, nagkanayon si Blackwater coach Aris Dimaunahan nga kinahanglan nilang tutokan ang pagdepensa sa eksplosibong import sa KaTropa nga si KJ McDaniels.
“Prolific scorer,” mao kini ang paghulagway ni Dimaunahan kang McDaniels, kinsa nag-average og 39.5 puntos sa duha ka mga duwa sa KaTropa sa Terrific 12.
“Susubukan naming depensahan ng mahusay,” matod ni Dimaunahan sa interbyu sa Spin.ph.
“Hindi ng iisang tao... ng lahat para malimitahan at para magkaroon kami ng mas malaking chance na manalo.”
Mismong si TNT coach Bong Ravena miangkon nga dakong obligasyon ang iyang ihatag kang McDaniels sa opensa kay kuwang pa sa pahuway ang duha sa iyang mga sinaligan nga sila si Troy Rosario ug Roger Pogoy.
Sila si Rosario ug Pogoy parehong sakop sa Gilas Pilipinas nga ningkombati sa dili pa tantong dugay nahuman nga FIBA Basketball World Cup sa China. (ESL)