SA PAGTUO sa sumosulbong nga si ALA figther KJ Cataraja, nahashasan na’g insakto ang iyang abilidad ug andam na siyang mohamag sa iyang gihandom nga away – ang pagpakigbatoik kang Mexican super flyweight star Juan Francisco Estrada.
Sa interbyu sa Sun.Star Cebu, gipadayag ni Cataraja ang iyang panghinaot nga mahatagan siya’g oportunidad sa pag-challenge kang Estrada, kinsa maoy tag-iya sa World Boxing Council (WBC) super flyweight title ug lineal champion sa 115-pound division.
Niadtong Lunes sa gabii, si Cataraja, kinsa lumad nga taga Tabuelan, Cebu, mirehistro na sab og yanong kadaugan main event sa ALA on Tour -”PMI Pride 6” sa PMI Colleges Taloto Campus sa Tagbilaran City, Bohol.
Ning maong tahas, gipaundang ni Cataraja sa 3rd round si Omayao.
Sa 1st round pa lang, gipakamang na ni Cataraja si Omayao pinaagi sa uppercut.
Sa 3rd round, giusban pagtumba ni Cataraja si Omayao pinaagi sa right straight ug ning higayuna, nahuman og sayo ang away.
Human niini, gipadayag ni Cataraja nga dili na siya interesado makig-away og dili bantugang mga boksidor ug gusto na siyang mohamag og mas malisod nga mga tahas sa umaabot.
Si Cataraja, kinsa kanhi usa sa dekalidad nga amateur boxers sa Sugbo, misaka sa 11-0, 9KOs nga rekord samtang si Omayao nahagbong sa 24-21-5, 8KO’s.
Matod ni Cataraja nga bisan kanus-a, andam siyang makig-away kang Estrada ug andam sab siyang mobiyahe sa Mexico kon mao kini ang makatuman sa iyang gihandom.
Gipasabot ni Cataraja nga ganahan gyud siyang makig-away kang Estrada gumikan kay mao kini ang usa sa mga labing bantugan sa ubos nga timbang.
Gawas niini, asoy ni Cataraja nga gusto niyang ipanimalos ang kapildihan nga nasinati sa ubay-ubay na sab nga Pinoy’ng mga boksidor ubos sa kamot ni Estarda. (ESL)