KANTA, mon!” matod ni Celso nga mitunol sa mikropuno sa iyang pag-umangkon nga si Solomon. Anak si Solomon sa ikatulo ug kinamanghuran niyang igsuon nga si Jacob. Ang ilang kinamaguwangan nga si Bella usa ka dalagang guwang nga tua sa Amerika manarbaho isip ‘domestic helper.’ Ilo na sila sa ginikanan.
“Di ko. Dili na nako ‘passion’! Wa koy hilig ana!” ni Solomon nunot ang pagyamiid.
Pista karon sa lungsod sa Amiraw. Nag-abang og Videoke si Celso, kay bisag propesyunal na siya (CPA). mahiligon gihapon siya sa musika ug kanta-kanta. Hilom nga napikal si Celso sa iyang pag-umangkon.
“Hambugerong dako!” tuaw ni Celso sa hilom. Nakahuman na siyag awit og usa ka kanta. Gitunol na lang niya ang mikropuno ngadto kang Hermo, iyang bayaw, kay maguwang sa iyang kapikas nga si Nova. Si Hermo ra maoy sagad nga makig-esparing niyag kanta-kanta samtang mag-inom.
Namuntar ang Videoke sa nataran sa ilang balay ni Celso ning sayo nga hapon. Misulod siya sa balay tungod sa sugo sa lawas.
Si Nova ang kasamtangang nag-asikaso ug nag-abi-abi sa mga bisita nga kasagaran mga paryente ug mga higala nilang Nova ug Celso. Inigka human nilag pangaon molingkod ang mga lalake atubangan sa Videoke. Si Asher, anak ni Hermo, ang tigtagay sa beer nga marka pulang kabayo. Si Jacob nga inom ray hilig igo lang naminaw sa nanganta ug kanunay nga naggunit og baso.
Way mga trabaho sila si Jacob ug ang iyang asawa nga si Raquel. Gisuportahan silag kuwarta gikan sa Amerika. Si Bella ang nigasto sa pagtungha ni Solomon sa hayiskol. Paggradweyt ni Solomon nakatrabaho siya sa call center. Apan kalit lang siya nga mibiya sa trabaho, kay gisugo kuno siya pag-alsa og mga kinarton. Nanakit ang iyang kalawasan.
Dako unta ang respeto ni Celso sa iyang pag-umangkon kay brayit. Balediktoryan paggradweyt. Nakaingon si Celso nga hayag og kaugmaon si Solomon. Dili sama sa ginikanan ni Solomon nga si Celso ang nigasto sa kasal ug hikay. Dayon si Bella ang nagbuhi kanila.
Paglabay sa mga adlaw nabalitaan na lang ni Celso nga mabdos ang uyab ni Solomon ug miipon na kini og puyo sa ila. Maayo gani kay wa momandar og kasal ang ginikanan sa babaye. Wa manarbaho si Solomon kay nag-apong sa mabdos niyang uyab. Iyang gibantayan kay apyugon ang iyang uyab nga nagmagdos.
Pagkadungog ni Bella sa balita nga nakapamabdos si Solomon naminti kini sa kalagot. Misaad nga di na motampo sa gastuhan sa kapritso ni Solomon. Mibalibad nga di na mopas-an sa pag-umangkon.
NAGHINANGAT na sab ang pista sa Amiraw. Nanganak na ang uyab ni Solomon. Mitampo lag gamay si Bella sa gastuhan, busa kulang. Nipirma og ‘promissory note’ sila si Solomon ug Jacob aron makagawas sa ospital ang inahan ug ang puya.
Pag-abot sa pista bisita na sab ni Celso sila si Solomon ug Jacob. Miabla si Solomon kang Celso nga mohuwam og kuwarta nga bayaran lang niya kon makatrabaho na siya.
“Ka wa baya gyud nimoy uwaw no? Abi man nakog brayit ka tungod sa imong pagka hambugero! Apan gisulod man nimo ang imong utok sa imong kinatawo! Kiyod man diay imong ‘passion’! Kasayon ra gyud huwaman ang paryente, kay puwede rag di bayran!” matod ni Celso ngadtong Solomon nga naglingkod sa ilang sala.
Wa pay laing bisita nga nakadungog. Si Jacob ra nga naamang ug nanglipaghong ang nawong. Miduko si Solomon. Mitulo ang iyang mga luha. Hilom nga nagbakho. Mihupas ang iyang pagka hambugero. (KATAPUSAN)