DEAR Papa Joe,
Tawga lang ko sa ngalan nga Toylits. Ang akong problema kabahin sa akong ka live in. Nasakitan ko kay kalit ko niya gibuwagan ug nikuyog sa akong bestfriend. Kaslunon na mi ani niya ug mao niy usa sa akong suliran kay nakagasto nako para sa umaabot namong kasal sama sa wedding rings ug para reception kay siya na man akong gipalihok.
Gibuwagan na lang ko niya pero wa gyud ko kakita sa singsing. Mao na lang unta ni akong gusto nga mabawi nako akong kwarta kay ako man siya gihatagan og P100,000 para lang ato. Ang akong problema kay nisibat sila na ug wala mi masayod asa sila puyo. Palihug tambagi ko unsaon nako pagbawi sa akong kwarta.
TOYLITS
Toylits,
Mas maayo imong panid-an sa lugar sa iyang mga sides kay basin naa ra na gatago-tago didto o ba kaha moadto ka sa iyang ginikanan ug hangyuon nimo nga motug-an sila kay sa madugay ug sa madali, mo-contact gyud to nila ang ilang anak. Kon ma-contact na nimo ang ilang anak o mahibaw-an asa puyo, ipa-barangay dayon nga maningil ka sa imong kwarta puslan man walay kasal mahitabo. Kon magmagahi man gani, kunsulta na lang gyud ka og abogado para maka-file ka og saktong kaso para niya. Kana lang ug salamat.
PAPA JOE
(sa inyong tampo ipadala lang sa papajoesuperb@gmail.com)