ANG Securities and Exchange Commission (SEC) niluwat og cease and desist order (CDO) batok sa dugang 11 ka online lending applications tungod sa giingong nagkadaiyang mga kalapasan.
Ang CDO, gipetsahan og Biyernes, Septiyembre 20, 2019, giluwatan batok sa Cash Whale, Cash 100, Cashafin, CashMaya, CashFlyer, Cashwarm, Cashope, Cashwow, Creditpeso, ET Easy Loan ug Peso2Go.
Ang SEC niingon nga ang lending applications gipadagan sa mga tawo nga way lisensya ug nag-operate sa di makatarunganon ug abusadong pamaagi sa pagpahuwam ug pagpaningil.
Ang online lending applications nagtanyag og mas sayon ug paspas nga paagi sa paghikay. Mao ni ang hinungdan nganong ang mga tawo mas ganahan sa online lending apps.
Ang CashWhale app nagtanyag og mas sayon nga data-data ug service fee nga i-charge og ka usa ra, gikan sa zero ngadto sa 20 porsyento, nga dunay interest rate nga usa ka porsyento matag adlaw.
Kalapasan
Ang apps nagtanyag og sayon nga paghikay ug paspas nga pag-release sa loan proceeds.
Niadtong Septiyembre 12, ang SEC niluwat usab og CDO batok sa mga operasyon sa 19 ka online lending applications: Instant Pera, QuickPera, Lendmo Philippines, Binixo, CashBus, Cashcat, Cashuttle, Crazy Loan, Flash Cash, Happy2Peso, Hatulong, MeLoan, MoneyTree Quick Loan, Pera Express, Pera4u, Peramart, PesoLending, QuickPeso ug Umbrella.
Matod sa SEC nga ang apps nakalapas sa Section 4 sa Republic Act 9474 kun Lending Company Regulation Act of 2007.
Ang balaud nagtakda nga ang lending company tukuron nga korporasyon. Nag-ingon nga kini nga “no lending company shall conduct business unless granted an authority to operate by the SEC.”
Bisan kinsang tawo nga magnegusyo og lending nga way balidong awtoridad gikan sa SEC mahimong multahan og P10,000 ngadto sa P50,000 o pagkapriso gikan sa unom ka buwan ngadto sa 10 ka tuig o sa duha, ubos sa Section 12 sa Lending Company Regulation Act.
Nakaplagan sa SEC Corporate Governance and Finance Department nga kining mao nga lending apps way certificates of authority to operate a lending o financing company sumala sa nalatid sa balaud.
Gi-revoke
Nimando usab ang Commission sa online lending opetators sa paghunong sa pagtanyag ug pag-advertise sa ilang lending business pinaagi sa internet ug papason o tangtangon ang promotional presentations ug pagtanyag sa lending business sa internet, lakip na ang lending applications nga ilang gipadagan.
Isip tipik sa ilang paggukod sa illegal lending, ang Commission ni-revoke usab sa certificates of registration sa 2,081 lending companies tungod sa ilang kapakyas sa gitakda nga certificate of authority to operate isip lending o financing company.
Sa 2019 lang, ang SEC ni-revoke sa registration sa 837 ka unlicensed lending firms. (SunStar Philippines)