NIADTONG niaging semana, usa ako sa mga mitambong sa Conversation on Mindanao History and Studies nga gipasiugdahan sa ForumZFD (Forum Ziviler Freidensdienst) ug Ateneo de Davao’s Al Q’aalam Institute.
Ang maong kalihukan gitambongan sa mga opisyales sa pribado ug publikong unibersidad sa Mindanao, non-government organizations (NGOs) ug mga national government agencies (NGAs), katawhang Moro ug lumad dinhi sa Mindanao.
Tumong sa maong aktibidad mao ang pagtuki sa paglakip sa ilhanan, kultura, lenguwahe, politika, kasaysayan, tradisyonal nga paagi sa paghusay, patigayon, ug uban pa diha sa giilang roadmap.
Nindot ang gihisgutan namo niadtong Septyembre 17-18 ning tuiga sanglit nakapahinumdom kanako sa dakong responsibilidad sa pagsusi sa kasaysayan sa isla sa Mindanao.
Gikan sa pagpaambit sa mga kaigsuonang Moro ug lumad, nadasig ako nga tun-an ang kahimtang sa matag tribu dinhi sa isla sa Mindanao.
Mas labaw ako nga nalipay tungod kay daghan kanamo nangandoy nga makabaton og ibro nga magpatik sa tinuod nga kasaysaysan sa isla.
Kini nga paningkamot nagtinguha sa pagtudlo niini sa mosunod nga mga henerasyon.
Pinaagi niini, suma sa mga representante, makabaton kita og kalinaw dinhi sa isla nga nagkagubot tungod sa di mao nga kasaysayan.
Ang roadmap nga gipresenta sa technical working group nindot nga sinugdanan sa paningkamot nga masayud kita kung kinsa kita isip mga Mindanawon nga napintahan sa kasaysayan nga ginama sa mga di taga Mindanao.
Daghang mga butang nga angay natong ikonsidera sa pagsuwat sa kasaysayan sa matag tribu dinhi sa isla.
Busa, gikinahanglan nato ang mga maayo ug dunay kasing-kasing sa mga Mindanawon nga mosuwat sa atong kasaysayan nga mao say atong itudlo sa mga kabataan sa tunghaan.
Dako ang akong pasalamat sa mga opisyales sa gobyerno nga mipadayag sa ilang suporta sa roadmap.
Pipila kanila mao ang Mindanao Development Authority, National Book Development Board, National Commission for Culture and the Arts, ug uban pa.