SAN ISIDRO, Davao del Norte -- Nangita karon og hustisya ang mga kabanay sa gipatay nga pulis sa Purok 1C, Barangay Igangon, alas 6 sa buntag, Lunes, Septyembre 23.
Ang biktima giila nga si Patrolman Alfie Alcano nga sakop sa 2nd Davao del Norte Provincial Mobile Force Company sa Malitbog, dakbayan sa Panabo ug molupyo sa Barangay Pinamuno, San Isidro.
Subay sa report, nasayran nga ang biktima nagmaneho sa gisakyang motorsiklo padung sa dakbayan sa Tagum apan pag-abot sa nahisgutang dapit, gipusil sa wala mailhing suspek gamit ang wala matinong kalibre sa armas tumong sa nagkadaiyang bahin sa lawas nga niresulta sa hinanaling kamatayon.
Human sa gihimong krimen, ang suspek nagdaling mikagiw palayo paingon sa wala masayring direksiyon.
Narekober gikan sa crime scene ang usa ka balinis ug basiyo sa bala sa gituohang kalibre .45 nga pistola, lakip ang service firearm sa biktima nga Glock 17 pistol nga may serial number 18638.
Ang pagpatay kang Alcano hugot nga gikondena ni Brigadier General Marcelo Morales ang hepe sa Police Regional Office-Davao nga nagbutyag nga ang pagpatay sa biktima usa ka dakong kalapasan sa tawhanong katungod.
Buot ni Morales nga makab-ot ang hustisya sa kamatayon sa pulis madaling panahon ug manubag sa balaod ang matuod nga sad-an. (Dexter T. Visitacion)