COTABATO CITY -- Wala magdahom ang usa ka sakop sa Citizen Armed Forces Geographical Unit (Cafgu) nga ang iyang makitang plastik nga kontiner dunay sulod nga bomba samtang nanghugas og plato daplin sa sapa.
Giinong dakong matang sa improvised explosive device (IED) ang nakaplagan ug daling gidepyus sa militar alas 10 sa buntag sa sapa sa may Sitio Butalo, Barangay Sambalawan, Datu Salibo, Maguindano Province.
Sumala sa 601st Brigade nga nanghugas og plato daplin sa sapa si Bryan Badal nga sakop sa Cafgu, ilawom sa 38th Infantry Battalion, Philippine Army sa dihang iyang nakita ang plastik nga kontiner.
Sa dihang gihiling ni Badal, dako ang iyang kakurat gumikan bomba ang sulod niini.
Abtik nga gitawagan ni Badal ang mga sundalo ug pulis sa Datu Salibo Municipal Police Station ug dali nga nakaresponde sa lugar.
Nahiabot sab ang mga sakop sa explosive ordnance disposal team sa Philippine Army ug daling gidepyus ang bomba.
Giingong ang IED gama sa mga lansang, pulbura, blasting cap ug cellphone isip triggering mechanism.
Grupo sa Bangsamoro Islamic Freedom Fighters ang gitudlo sa mga awtoridad nga nagbilin sa maong bomba. (Edgar E. Fuerzas)