KANHI job order nga kawani sa Cebu City Hall nadakpan sa kapulisan sa usa ka buy-bust sa Martes sa kaadlawon, Septiyembre 25, sa iyang pinuy-anan sa Sitio Mabini, Barangay San Roque, Dakbayan sa Sugbo.
Si P/Maj. Joemar Pomarejos, hepe sa Waterfront Police Station, uban sa iyang mga sakop sa Drug Enforcement Unit, ni buy-bust kang Jesus Parawan, alyas Jun Jun, 35, lumolupyo sa maong dapit.
Si Parawan gi buy-bust human masuta nga namaligya og illegal drugs base sa mga sumbong sa mga opisyal sa barangay ngadto sa kapulisan.
Ang iyang kauban nga si Ariel Evarientos, 54, usa ka electrician, taga Barangay Linao, Dakbayan sa Talisay, nasikop usab kay naabtan sa kapulisan sulod sa balay ni Parawan.
Giingong magkuha unta sa iyang supply si Evarientos dihang naabtan sa kapulisan.
Nakuha gikan sa duha ang gibana-bana nga 16 gramos nga shabu gikan sa ilang posisyo.
Ang duha kasamtangan nga gitanggong sa Waterfront Police Station.
Laing usa pa ka gikatahapang drug pusher nasikop usab nila ni Pomarejos dihang nihimo sila og buy bust sa aginan padulong sa balay ni Parawan human napalitan sa ilang pusuer buyer.
Napahigayon ang buy-bust sa wa pa rumboha ang balay ni Parawan.
Giila ni Pomarejos ang suspek nga si Isha Manding, 36, taga lungsod sa Barili, Sugbo.
Wa magdahom si Manding nga mga pulis ang paingon kaniya human nisinyas ang pulis nga poseur buyer nga mipalit kaniya og shabu.
“Milahos lang ang atong pusuer buyer paingon sa among target gyud aron di mabulabog,” matod ni Pomarejos.
Nakuha gikan kang Manding ang gibana-banang gramos nga shabu lakip na ang napalit nga pakete sa shabu sa ilang pusuer buyer.
Dugang pa ni Pomarejos nga gibana-bana nga anaa sa 21 gramos tanan ang ilang nasakmit sa manag lahi nga operasyon nga mokantidad na sa P142,000 base sa Dangerous Drugs Board (DDB) value. (BBT)