GIDAYEG sa Department of Interior and Local Government (DILG) officer sa siyudad sa Talisay ang dakong kausaban og kalambuan sa barangay Tabunok market ug ingon man sa mga kalsada ug sidewalk niini nga nahibalik na ngadto sa katawhan.
Kini ang gitug-an ni Liza Fernandez sa DILG sa Talisay City.
Si Fernandez ang lakip sa nihimo sa pre-validation kon inisyal nga pagsusi, sa maong dakbayan kalabot sa pagpatuman sa kamanduan ni Presidente Rodrigo Duterte, alang sa pagpabalik sa kalsada o sa sidewalk ngadto sa katawhan.
“As the DILG officer of Talisay City, I see big improvement, from before the road clearing and now it is implemented, hapsay na ang atoang City of Talisay, especially the Tabunok market,” asoy ni Fernandez. “Before, kay ako commuter man pud ko, bisan asa ka lang mopara og tricycle ug mosakay (Tabunok area), but now naa na gyud sila system ug lugar asa sila pwede mosakay. Naa na gyud terminal, not like sauna nga mao ng mag-traffic kay anybody makapara, anywhere. Limpyo na sad didto ang mga tindahan, ang sidewalk, talking the tabunok center, kay mao man ang pinaka-problema sa Talisay City,” dugang ni Fernandez.
Hinuon matud ni Fernandez nga nag-agad pa usab sila sa ipagawas unya nga report sa DILG regional office nga gipangulohan ni Director Leocaldo Trovela..
Kalabot sa findings sa director, diha sa gihimo nga striktong’ pagpatuman sa paghawan sa mga ilegal structure ug pagdili nga mahimo paradahan ang sidewalk, o kilid sa dalan, nga alang sa pedestrian.
Gihimo ang inspeksyon Martes sa buntag, Septiyembre 24, uban nila sila Talisay City Police station chief, Police Major Orlando Carag, Jr, Talisay City Fire marshal, F/SI Arra Alpajaro.
Anaa usab ang pangulo sa City of Talisay Traffic Operations Development Authority (CT-TODA), Jonathan Tumulak, kinsa nitug-an nga sukad sa ilang pagpatuman sa mandu, strikto usab nga pag-monitor ang ilang gihimo.
Gitug-an sa mayor sa syudad sa Talisay, Samsam Gullas, nga gipili sa ilang administrasyon nga unahon sa paghapsay ang ilang gitan-aw nga adunay dakung’ problema, nga mao ang Tabunok, aron usab mosunod na ang ubang barangay nga adunay susama nga problema.
Matud ni Tumulak nga lakip sa ilang gitutokan nga adunay susamang problema mao ang Bulacao, San Isidro, Poblacion ug Dumlog.
Sa sunod bulan mohimo og laing pagsusi ang DILG, kini alang na sa pagtapos sa gihatag nga 60 ka adlaw sa pagpatuman sa mandu sa pangulo sa nasud. (FMD)