ANG hagit nga duwelo ni Presidential Anti-Smuggling Group Mindanao chief Eduardo Matillano ngadto kang Mayor Rodrigo Duterte gitubag na sa mayor pinaagi sa paghagit kaniya nga patabangon sila si House Speaker Prospero Nograles.

Ang hagit sa mayor giluwatan atol sa iyang programa sa telebisyon nga "Gikan sa Masa Para sa Masa" sa ABS-CBN niadtong Domingo.

Si Duterte nagsulti nga makig-duwelo siya kang Matillano kung kauban niini si Nograles nga sumala niya "naghatag og problema" sa siyudad sa Davao.

"Kung makig-duel ka nako, di ko makontento kung ikaw lang ang moatubang nako. Apila ang imong amo nga si Nograles. Ang problema dinhi sa Davao kana si Nograles ug Palparan. Kamong tulo ang problema," ni Duterte nga midawat sa hagit ni Matillano.

Gawas kang Nograles gilakbitan sa mayor si Bantay Party-list Representative Retired General Jovito Palparan kinsa gideklara di pa dugay nga persona non grata sa konseho sa siyudad sa Davao.

Si Palparan giingon nga nakadaot sa imahe sa siyudad pinaagi sa pagsulti sa radyo ug mantalaan nga dili maayong puy-an ang siyudad mao nga mipasaka og resolusyon ang mga konsehal sa siyudad nga nagdeklara kaniya nga persona non grata.

Si Duterte nagsulti ngadto kang Matillano nga dili lang siya ang nagsamok sa siyudad apan apil sila Nograles ug Palparan nga unang gidudahan nga maoy nagpasiugda sa bomb scare sa siyudad niadtong Pebrero 25.

"Kamong tulo ang nagdala og tigaw sa Davao. Karon kung mosugot ko og duwelo, di ko mosugot nga ikaw lang ang moatubang nako. Kamong duha ni Nograles ang gusto nako para kuridas. Para mahuman ang problema sa Davao, gusto nako kamong duha unya ako lang usa. Ayaw kabalaka kay duha man sab ka pusil ang akong dalhon," pahayag sa mayor kinsa nagmustra sa iyang duha ka mga kamot atubangan sa telebisyon.

Ang mayor nagsaway kang Matillano kinsa nanghambog, sumala niya, nga iyang gisagpa si Senator Panfilo Lacson pila ka tuig na ang milabay.

"Ang akong nahibaloan nga si Matillano nanagpa og attendant sa Holiday Spa. Nagpamasahe ka unya nag-ring ang imong cell phone, giingnan kay sa attendant nga pahinayan pero nasuko ka ug imong gisagpa ang babaye. Mao lang na ang imong kaya nga sagpaon. Sulayi ko'g sagpa? Tan-awon nato og mabuhi ka!," ni Duterte kinsa nagpahayag nga wala niya sakyi ang maong hitabo tungod kay gihangyo siya ni Presidente Gloria Arroyo nga dili padak-on ang isyu.

Ang away sa duha ka mga opisyal miguwa human gironda ang patigayon sa mga negosyante nga suod nga higala ni Mayor Duterte niadtong Enero 29.

Sa maong ronda, ang Sales outlet sa Felcris Supermarket gisusi sa mga sakop sa PASG nga gipangulohan ni Matillano gumikan sa pagtuo nga gibaligya didto ang mga smuggled goods.

Mga appliance center, shopping arcade, ug retail outlets sa mga dumadapig ni Duterte gironda sab sa PASG mao nga nasuko ang mayor sanglit dili illegal ang negosyo sa iyang mga higala. (AD)