KAPIN sa 80,000 ka mga punoan sa marijuana nga mobalor og P32 milion gipang-ibot sa mga sakop sa Balamban Police Station, Cebu Police Provincial Office inabagan sa Philippine Drug Enforcement Agency 7 ug sa 47th Infantry Battalion sa Philippine Army sa Barangay Gaas, bukirang dapit sa lungsod sa Balamban.
Mao kini ang labing dakong balor sa marijuana nga nalarot sa kapulisan sa Sugbo ning tuiga.
Pasado alas 7 sa buntag sa Martes, Septiyembre 24, girumbo sa kapulisan ug kasundaluhan ang usa ka luna nga nahimutang sa sitio Quo, Barangay Gaas tungod sa nadawat nga report labot sa daghang marijuana plantation.
Gibana-bana nga moabot ngadto sa 20 kilometros ang gilay-on sa lugar gikan sa highway sa Barangay Gaas diin mga mag-uuma lang ang namuyo. Pag-abot sa dapit, nisugat sa panan-aw sa mga pulis, sundawo ug PDEA 7 agents ang tag-as nga na nga tanom nga marijuana nga mahimo nang anihon.
Matod ni Police Colonel Roderick Mariano, hepe sa CPPO, nga adunay concerned citizen nga niduol sa barangay officials nga mipahibawo labot sa marijuana plantation sa sitio Quo.
Way nadakpan nga suspek nga maoy nagtanom apan aduna silay tulo ka mga ngalan nga gituohan nga maoy nanamom sa marijuana nga silang alyas Tisi Palando, Rodrigo Cabalis ug Lordi Pragosa, mga lumolupyo ra usab sa maong lugar.
“Mayron tayong mga concern citizen na nagpunta sa ating mga barangay officials at immediately nag coordinate ang mga officials sa ating Mobile Force Company. When we validated yung report, we coordinated sa PDEA at sa Philippine Army,” matod ni Mariano.
Tungod sa kadaghan sa mga punoan sa marijuana nga nakuha, nahukman sa CPPO nga didto nalang kini sunugon nga adunay pagtugot sa PDEA 7.
Si Balamban Mayor Alex Binghay nga nangunay sa pagsaksi sa operation sa kapulisan nagkanayon nga dugay na nga problema ang marijuana sa ilang lungsod.
Gani niadto pa kining dekada 80 apan ang nakuha kagahapon maoy labing dako nga niabot na og P32 million.
Usa sa mga hinungdan, matod sa mayor, nganong padayon nga nananom og marijuana ang pipila ka mga mag uuma sa bukid tungod sa kamahal niini.
Ang mga barangay sa lungsod sa Balamban nga apektado sa marijuana plantation mao ang Bakong, Magsaysay ug Gaas, pulos naa sa mga bukirang dapit sa maong lungsod.
Matod sa mayor nga aduna na silay gihatag nga livelihood program sa mga mag uuma sa Balamban aron di na sila mananom og marijuana apan didto lang gihapon sila sa dali nga makakwarta bisan illegal.
“Attractive man gud ning marijuana ba kay when you go out and market your product, all you have to do sipitan ra nimo ang 1 kilo daghan na imong kwarta. Ang ato lang gyud ani nga sigihan nato og pahimangno ang katawhan sa kadaot nga mahitabo,” matod ni Binghay.