120 kanhi NPA nga misurender sa MisOr makadawat og ayuda

MAHATAGAN na ug maayong kaugmaon ug makasugod sa pagkinabuhi nga normal ug labaw sa tanan dili na layo sa pamilya ang mga kanhi miyembro sa New People’s Army (NPA) nga nibalik sabakan sa gobyerno.

Kini human kagamhanan sa Kapitolyo Probinsyal pinaagi sa Provincial Social Welfare and Development Office (PSWDO) ang nag profile agi hatag og ayuda sa mga kanhi NPA nga mibalik sa sabakan sa gobyerno aron kwalipikado sa programang Enhanced Comprehensive Local Integration Program (E-Clip).

Kini ang gibutyag ni PSWDO head Jhunleymar Abella atol sa bag-ohay lang nga report niini sa pagpakayab sa nasudnong bandila sa kapitolyo probinsya.

Gibutyag niini nga 120 ka mga kanhi NPA nga taga Misamis Oriental ang ilang gikuhaan og data aron eendorso ngadto sa Department of Interior and Local Government (DILG) ug kini sila makadawat og P65,000.00 matag usa kanila.

Ang P15,000 nga ayuda alang sa immediate assistance samtang ang P50,000.00 mao ang livelihood assistance.

Ang buhatan sa PSWD modugang sab og laing P5,000 kanila ug sa kinatibuk-an moabot ngadto sa P600,000.00 ang gigahin alang sa walhong grupo.

Kini aron pagsigurong makasugod ug makatabang sa maayong pagkinabuhi.

Sa iyang bahin si Misamis Oriental Governor Bambi Emano misuporta sa programang E-Clip tungod kay dako og tabang sa mga walhong grupo nga mobalik sa komunidad.

Bout gihapon niining magpadayon ang hisgotanang pangkalinaw gumikan kay daw walay magmalinawon kung ang giyera maoy ipatigbabaw.